आयपीएलमध्ये तुफान फॉर्ममध्ये असलेला बटलर म्हणतोय, ‘आयुष्यातील सर्वात चांगल्या फॉर्मचा आनंद घेतोय’

जोस बटलर याच्या शतकी खेळीच्या जोरावर शुक्रवारी (२२ एप्रिल) राजस्थान रॉयल्सने दिल्ली कॅपिटल्सला १५ धावांनी पराभूत केले. आता राजस्थानचा संघ १० गुणांसह गुणतालिकेत पहिल्या क्रमांकावर पोहचला आहे. इंग्लंडचा सलामीवीर बटलर चालू आयपीएल हंगामात जबरदस्त फॉर्ममध्ये आहे. दिल्ली कॅपिटल्सविरुद्ध त्याने हंगामातील स्वतःचे तिसरे शतक ठोकले. यासाठी त्याला सामनावीर पुरस्काराने सन्मानित केले गेले. पुरस्कार स्वीकारल्यानंतर बटलरने खास प्रतिक्रिया दिली.

बटलरने दिल्लीविरुद्ध खेळताना ६५ चेंडूंचा सामना केला. यामध्ये त्याने ९ चौकार आणि ९ षटकारांच्या मदतीने ११५ धावा ठोकल्या. सामनावीर निवडले गेल्यानंतर मुलाखतीत जोस बटलर (Jos Buttler) म्हणाला की, “मी आनंद घेतला. मला हे स्टेडियम खूप आवडते. माझी पहिली आयपीएल याच ठिकाणी मुंबई इंडियन्ससोबत झालेली. मी माझ्या आयुष्यातील सर्वात चांगल्या फॉर्मचा आनंद घेत आहे. मी हा फॉर्म पुढेही कायम ठेवण्याची गरज आहे. चेंडू पहिल्या षटकात स्विंग झाला आणि थोडी अडचण देखील निर्माण झाली. तुम्ही हा दबाव झेलणे आणि त्यातून बाहेर निघणे गरजेचे असते. एकदा तुम्ही हे पार केले, तर आत्मविश्वास पुन्हा तयार होतो.”