‘या’ संघांतील सामन्याने होणार आयपीएल २०२२ हंगामाची सुरुवात? वाचा सविस्तर

आयपीएल २०२२ (IPL 2022) स्पर्धा २६ मार्चपासून सुरू होणार आहे. स्पर्धेचा सुरुवातीचा सामना मुंबईच्या वानखडे स्टेडियममध्ये खेळला जाणार आहे. बीसीसीआयने दिलेल्या माहितीनुसार यावर्षी आयपीएलचे साखळी फेरीचे सामने मुंबई आणि पुणे स्थित चार स्टेडियममध्ये आयोजित केले जाणार आहेत. अशी माहिती समोर येत आहे की, चेन्नई सुपर किंग्ज आणि कोलकाता नाइट रायडर्स (CSK vs KKR) यांच्यात स्पर्धेचा पहिला सामना खेळला जाईल.

आयपीएलचा इतिहास पाहता मागच्या हंगामात जे दोन संघ अंतिम सामन्यापर्यंत पोहोचले होते, त्यांच्यात आगामी हंगामाचा पहिला सामना खेळवला जातो. आयपीएल २०२१ मध्ये एमएस धोनीच्या नेतृत्वातील चेन्नई सुपर किंग्ज आणि ओएन मॉर्गनच्या नेतृत्वातील कोलकाना नाइट रायडर्स आमने-सामने होते. सीएसकेने २७ धावा राखून केकेआरला मात दिली होती आणि इतिहासातील त्यांची चौथी आयपीएल ट्रॉफी जिंकली होती.

यावर्षी आयपीएलमध्ये लखनऊ सुपर जायंट्स आणि गुजरात टायटन्स या दोन नवीन फ्रेंचायझी सहभागी होणार असल्यामुळे संघांची संख्या ८ ऐवजी १० असणार आहे. या १० संघात एकूण ७० साखळी सामने खेळले जातील. हे सामने ग्रुप ए आणि ग्रुप बी या पद्धतीने होतील. स्पर्धेतील ५५ सामने मुंबईच्या वानखडे, ब्रेबोर्न आणि डीवाय पाटील या तीन स्टेडियमवर खेळले जातील. तर पुणे स्टेडियममध्ये राहिलेले १५ सामने आयोजित केले जाणार आहेत. इंडियन एक्सप्रेसच्या माहितीनुसार बांद्राच्या कुर्ला कॉम्पलेक्स आणि ठाण्याच्या दादोजी कोंडादेव स्टेडियमच्या संघांना सरावासाठी ठेवले जाईल.