इंडियन प्रीमियर लीग (IPL) मधील गुजरात टायटन्स (GT) संघाने आपल्या थोड्याच कालावधीत भक्कम नेतृत्व आणि उत्कृष्ट खेळाच्या जोरावर उल्लेखनीय यश मिळवले आहे. संघाने 2022 मध्ये पदार्पण केले, लगेचच आपली ओळख निर्माण केली. आतापर्यंत गुजरात टायटन्सच्या नेतृत्वाची जबाबदारी तीन खेळाडूंनी सांभाळली आहे. ज्यात हार्दिक पांड्या, शुबमन गिल आणि रशिद खान यांचा समावेश आहे. या तिघांनीही आपल्या शैलीने संघाचे नेतृत्व करताना वेगवेगळे ठसे उमटवले आहेत.
हार्दिक पांड्याला 2022 मध्ये गुजरात टायटन्सच्या पहिल्या हंगामात कर्णधारपद देण्यात आले. त्याने आपल्या नेतृत्वगुणांनी संघाला थेट विजेतेपद मिळवून दिले. त्याच्या नेतृत्वाखाली गुजरातने 2022 हंगामात 14 पैकी 10 सामने जिंकत गुणतालिकेत अव्वल स्थान पटकावले. त्यानंतर प्ले-ऑफमध्येही दमदार कामगिरी करत राजस्थान रॉयल्सवर अंतिम सामन्यात विजय मिळवला. 2023 मध्येही त्याने संघाचे नेतृत्व केले आणि गुजरातला पुन्हा अंतिम फेरीत पोहोचवले. हार्दिकच्या नेतृत्वाखाली गुजरात टायटन्सने एकूण 31 सामने खेळले ज्यात 22 सामने जिंकले तर 09 सामने गमावले. या कामगिरीने हार्दिकने उत्कृष्ट कर्णधार म्हणून स्वतःची ओळख निर्माण केली.
2024 हंगामात हार्दिक पांड्या मुंबई इंडियन्सकडे परतल्यानंतर गुजरात टायटन्सने युवा फलंदाज शुबमन गिलला कर्णधारपद सोपवले. गिलसाठी ही एक मोठी संधी आणि आव्हान होते. आतापर्यंतच्या 12 सामन्यांमध्ये गिलच्या नेतृत्वाखाली गुजरातने चांगली कामगिरी करण्याचा प्रयत्न केला आहे. गिल हा प्रतिभावान फलंदाज असून, संघाच्या भविष्यासाठी एक महत्वाचा कर्णधार ठरू शकतो. त्याच्या नेतृत्वगुणांमुळे गुजरात टायटन्सची नवी घडण होत आहे.
अफगाणिस्तानचा स्टार लेगस्पिनर रशिद खान हा संघाचा उपकर्णधार आहे आणि 2022-23 च्या हंगामात दोन सामन्यांसाठी त्याने कर्णधारपदाची धुरा सांभाळली. हार्दिक पांड्या अनुपस्थित असताना, त्याने 2 सामन्यात संघाचे उत्तम नेतृत्व केले. रशिद खानचा अनुभव आणि त्याच्या रणनीती संघासाठी महत्त्वाच्या ठरतात.
गुजरात टायटन्सने पदार्पणाच्या पहिल्याच हंगामात विजेतेपद मिळवले आणि नंतरही स्थिर कामगिरी करत आपले स्थान मजबूत केले. हार्दिक पांड्याने संघाला सुरुवातीला दिशा दिली, शुबमन गिल नव्या उर्जेने संघाचे नेतृत्व करत आहे, तर रशिद खानने वेळोवेळी संघाला मदतीचा हात दिला आहे. गुजरात टायटन्सच्या समर्थकांसाठी हा संघ भविष्यातही चांगली कामगिरी करेल, अशी आशा आहे.
गुजरात टायटन्सचे आजपर्यंतचे कर्णधार
हार्दिक पांड्या
2022-23
सामने 31
शुबमन गिल
2024-24
सामने 12
रशिद खान
2022-23
सामने 02
