भारतात सध्या कोविड-१९ महामारीने पाय पसारले आहेत. मागील काही दिवसांत भारतीय दिग्गज सचिन तेंडूलकरपासून ते महिला संघाची कर्णधार हरमनप्रीत कौरपर्यंत बरोच क्रिकेटपटू कोरोनाच्या विळख्यात सापडले आहेत. अशात नुकताच इंडियन प्रीमीयर लीगच्या कोलकाता नाईट रायडर्स संघाचा खेळाडू नितीश राणा कोरोना पॉझिटिव्ह आढळला आहे.
माध्यमांतील वृत्तांनुसार राणा गोवामध्ये सुट्टींतील कालावधी घालवण्यानंतर केकेआर संघात सहभागी झाला होता. त्यानंतर त्याचा कोरोना अहवाल पॉझिटिव्ह आढळला आहे. मात्र अजून अधिकृतरित्या केकेआरकडून किंवा नितिश राणाकडून याबद्दल माहिती देण्यात आलेली नाही. राणा सध्या मुंबई स्थित केकेआरच्या हॉटेलमध्ये विलगीकरणात आहे. डॉक्टरांची टीम त्याच्यावर लक्ष ठेवून आहे.
दिनांक ९ एप्रिल पासून आयपीएल २०२१ चा हंगाम सुरू होणार आहे. चेन्नई येथे मुंबई इंडियन्स विरुद्ध रॉयल चॅलेंजर्स बेंगलोर यांच्यात हंगामातीला पहिला सामना होईल. तर केकेआरचा यंदाचा पहिला सामना २ दिवसांनंतर अर्थात ११ एप्रिल रोजी होणार आहे. त्यांना पहिल्याच सामन्यात सनरायझर्स हैदराबादशी दोन हात करावे लागणार आहे.
