‘इथे कमजोरांना जागा नाही..’, गुजरातविरुद्धच्या पराभवानंतर लखनऊच्या खेळाडूंवर भडकला मेंटॉर गंभीर

आयपीएलचा पहिला हंगाम खेळणारे संघ लखनऊ सुपर जायंट्स आणि गुजरात टायटन्स जबरदस्त फॉर्ममध्ये आहेत. मंगळवारी (१० मे) या दोन्ही संघांचा आमना सामना झाला. गुजरातने या सामन्यात तब्बल ६२ धावांच्या अंतराने लखनऊला मात दिली. लखनऊला मिळालेल्या पराभवानंतर त्यांचा मेंटॉर आणि माजी भारतीय फलंदाज गौतम गंभीर चांगलाच निराश झाला. सामना संपल्यानंतर ड्रेसिंग रूममध्ये त्याने खेळाडूंना धारेवर धरले. लखनऊ सुपर जायंट्सच्या अधिकृत इंस्टाग्राम खात्यावरून हा व्हिडिओ शेअर केला गेला आहे.

लखनऊ संघाचा मेंटॉर गौतम गंभीर (Gautam Gambhir) ड्रेसिंग रूममध्ये खेळाडूंना म्हणाला की, “हारण्यामध्ये काहीही हरकत नाहीये. क्रिकेटमध्ये एक संघ हारतो, तर दुसरा जिंकतो. पण आपण गुजरात टायटन्सविरुद्ध पराभव स्वीकारला आहे. आपण आजच्या सामन्यात खूप कमजोर होतो आणि आयपीएलसारख्या स्पर्धेत कमजोरांना कुठेच स्थान नाहीये. आपण याआधीही चांगले क्रिकेट खेळले आहे आणि चांगल्या संघांवर मात केली आहे. पण आजचा सामना पाहून वाटले की, आपल्याकडे काहीच गेम सेंस नाव्हता.”

महा स्पोर्ट्सचा व्हॉट्सअप ग्रुप जॉइन करण्यासाठी इथे क्लिक करा

गंभीरने पुढे बोलताना संघातील गोलंदाजांचे मात्र कौतुक केले. तो म्हणाला की, “गुजरातने या सामन्यात चांगली गोलंदाजी केली, यात काहीच शंका नाहीये. आंतरराष्ट्रीय क्रिकेट खेळणाऱ्या गोलंदाजांकडून अशीच अपेक्षा असते. आपण अशाप्रकारच्या आव्हानांसाठीच दिवस रात्र सराव करत असतो. अशात आपल्याला यातून धडा घ्यावा लागेल.”

https://www.instagram.com/p/CdZKhChsmS8/