भारतीय क्रिकेटसाठी हा दिवस ठरणार ऐतिहासिक! एकाच दिवशी दोन वेगवेगळ्या देशांविरुद्ध मैदानात उतरणार टीम इंडिया!

आगामी काळात भारतीय क्रिकेटसाठी (indian Cricket) 3 ऑक्टोबर हा दिवस ऐतिहासिक ठरणार आहे. या दिवशी टीम इंडिया दोन देशांविरुद्ध मैदानात उतरू शकते. भारतीय क्रिकेटच्या इतिहासात असे दुसऱ्यांदा घडणार आहे, जेव्हा भारतीय संघ एकाच दिवशी दोन वेगवेगळ्या देशांमध्ये सामने खेळेल. खरंतर, 3 ऑक्टोबरला टीम इंडियाला वेस्ट इंडिजविरुद्ध तिसरा वनडे सामना खेळायचा आहे. त्याच दिवशी 2026 आशियाई क्रीडा स्पर्धेत क्रिकेटचा सुवर्णपदकाचा सामनाही खेळवला जाणार आहे.

जर टीम इंडिया आशियाई क्रीडा (Asian Games) स्पर्धेत सुवर्णपदकाच्या सामन्यासाठी पात्र ठरली, तर 3 ऑक्टोबरला त्यांना दोन सामने खेळावे लागतील. एक सामना आशियाई क्रीडा स्पर्धेतील सुवर्णपदकासाठी जपानमध्ये खेळवला जाईल. तर दुसरा सामना वेस्ट इंडिजविरुद्ध न्यू चंदीगडमधील मुल्लांपूर येथे होईल.

2026 आशियाई क्रीडा स्पर्धेत 3 ऑक्टोबरलाच जपानमधील निशिन येथील कोरोगी स्पोर्ट्स पार्कमध्ये पुरुष क्रिकेट स्पर्धेतील कांस्यपदक आणि सुवर्णपदकाचे सामने खेळवले जातील. आशियाई क्रीडा स्पर्धेत टीम इंडिया थेट उपांत्यपूर्व फेरीचा सामना खेळणार आहे.

सप्टेंबरमध्ये टीम इंडिया एकूण 6 सामने खेळणार आहे. हे सर्व सामने मर्यादित षटकांच्या क्रिकेटमधील असतील. म्हणजेच या महिन्यात भारतीय संघ एकही कसोटी सामना खेळणार नाही. सप्टेंबरमध्ये टीम इंडियाला अफगाणिस्तानविरुद्ध दिल्लीत 3 सामन्यांची टी-20 (T20 Series against Afganistan) मालिका खेळायची आहे. या मालिकेला 13 सप्टेंबरपासून सुरुवात होईल. त्यानंतर महिन्याच्या अखेरीस भारताला वेस्ट इंडिजविरुद्ध दोन वनडे सामनेही खेळायचे आहेत. ही मालिका तीन वनडे सामन्यांची असेल, मात्र त्यापैकी दोन सामने सप्टेंबरमध्ये खेळवले जातील. याशिवाय 2026 आशियाई क्रीडा स्पर्धेतील उपांत्यपूर्व फेरीचा सामनाही भारतीय संघ याच महिन्यात खेळणार आहे.

2026 आशियाई क्रीडा स्पर्धेसाठी टीम इंडियाची घोषणा झाली आहे. मात्र, वेस्ट इंडिजविरुद्धच्या वनडे मालिकेसाठी अद्याप भारतीय संघाची घोषणा झालेली नाही. हे स्पष्ट आहे की, आशियाई क्रीडा स्पर्धेत खेळणारे भारतीय खेळाडू वेस्ट इंडिजविरुद्धची वनडे मालिका खेळणार नाहीत. आशियाई क्रीडा स्पर्धेत श्रेयस अय्यर (Shreyas Iyer) टीम इंडियाचा कर्णधार असेल. संघात अभिषेक शर्मा, संजू सॅमसन, ईशान किशन, तिलक वर्मा, शिवम दुबे, नितीश कुमार रेड्डी, अक्षर पटेल, वॉशिंग्टन सुंदर, वरुण चक्रवर्ती, रवी बिश्नोई, जसप्रीत बुमराह, हर्षित राणा, अर्शदीप सिंह आणि वैभव सूर्यवंशी यांचा समावेश आहे. हे सर्व खेळाडू वेस्ट इंडिजविरुद्धच्या वनडे मालिकेत टीम इंडियाचा भाग नसतील.

भारतीय क्रिकेटच्या इतिहासात 12 सप्टेंबर 1998 रोजी असे यापूर्वी घडले आहे. त्यावेळी कॉमनवेल्थ गेम्समध्ये टीम इंडिया खेळली होती. त्याच दिवशी भारतीय संघाने सहारा कपमध्ये पाकिस्तानविरुद्धही सामना खेळला होता. विशेष म्हणजे, भारताने हे दोन्ही सामने जिंकले होते.