आजपासून बरोबर एक महिन्याने 15 ऑगस्ट 2025 रोजी भारत आपला 78 वा स्वातंत्र्यदिन साजरा करणार आहे. 1947 मध्ये याच तारखेला भारताला ब्रिटीशांच्या जुलूमातून स्वातंत्र्य मिळाले. इंग्लंडच्या भूमीवर 1947 च्या आठवणी पुन्हा एकदा ताज्या झाल्या आहेत. खरं तर, टीम इंडिया त्याच भूमीवर पाच सामन्यांच्या कसोटी मालिकेत इंग्लंडचा सामना करत आहे. नवीन कसोटी कर्णधार शुभमन गिलच्या नेतृत्वाखाली, भारताची युवा टीम इंग्लंडच्या भूमीवर आपल्या कामगिरीने भरपूर यश मिळवत आहे.
लॉर्ड्स कसोटीत भारतीय संघाला पराभवाचा सामना करावा लागला असला तरी गिलच्या सैन्याने ब्रिटिशांना जोरदार टक्कर दिली. संघाच्या कामगिरीने प्रभावित होऊन, ग्रेट ब्रिटनचे राजा चार्ल्स यांनी भारतातील पुरुष आणि महिला संघांना भेटण्यासाठी आमंत्रित केले. बीसीसीआयचे उपाध्यक्ष राजीव शुक्ल यांच्या नेतृत्वाखाली भारतीय संघ राजा चार्ल्सला भेटण्यासाठी पोहोचला. या खास प्रसंगी राजीव शुक्लाने त्यांचे पुस्तक राजा चार्ल्स यांना भेट देऊन 1947 च्या आठवणी पुन्हा एकदा ताज्या केल्या.
किंग चार्ल्स यांच्यासोबत झालेल्या एका खास भेटीत राजीव शुक्ला यांनी त्यांना भारत-पाकिस्तान फाळणीवर लिहिलेले त्यांचे “स्कार्स ऑफ 1947” हे पुस्तक भेट दिले. बीसीसीआयच्या उपाध्यक्षांनी त्यांच्या एक्स अकाउंटवर किंग चार्ल्स यांच्यासोबतच्या भेटीचा फोटोही शेअर केला. त्यांनी ट्विट केले की, किंग चार्ल्स यांनाही या पुस्तकाबद्दल जाणून घेण्यास खूप रस होता. भारतीय संघातील खेळाडूंनीही किंग चार्ल्स यांची भेट घेतली, ज्यांचे फोटो सोशल मीडियावर व्हायरल होत आहेत.
