यंदाच्या १५व्या आयपीएल हंगामात खेळाडू आपल्या वादळी खेळीचे दर्शन प्रेक्षकांना घडवत आहेत. यातील एक नाव म्हणजे राजस्थान रॉयल्सचा जोस बटलर. बटलर या हंगामात पहिल्या सामन्यापासून धावा चोपताना दिसतोय. अशात गुरुवारी (दि. १४ एप्रिल) हंगामातील २४वा सामना राजस्थान रॉयल्स आणि गुजरात टायटन्स संघात खेळला गेला. नवी मुंबईच्या डॉ. डी. वाय. पाटील स्पोर्ट्स अकादमी येथे झालेल्या या सामन्यात बटलरने पुन्हा एकदा आपल्या फलंदाजीचा जलवा दाखवला. यामुळे त्याने खास कारनामा स्वत:च्या नावावर नोंदवला आहे.
या सामन्यात प्रथम फलंदाजी करताना गुजरात (Gujarat Titans) संघाने निर्धारित २० षटकात ४ विकेट्स गमावत १९२ धावा केल्या. या आव्हानाचा पाठलाग करताना राजस्थानचा (Rajasthan Royals) सलामीवीर फलंदाज जोस बटलरने (Jos Buttler) खणखणीत अर्धशतक पूर्ण केले. त्याने अवघ्या २३ चेंडूत ३ षटकार आणि ८ चौकार चोपत ५४ धावा केल्या. विशेष म्हणजे, हे अर्धशतक त्याने पावरप्लेमधील शेवटच्या म्हणजेच सहाव्या षटकाच्या पाचव्या चेंडूवर पूर्ण केले.
महा स्पोर्ट्सचा व्हॉट्सअप ग्रुप जॉइन करण्यासाठी लिंकवर क्लिक करा
असा कारनामा करण्याची त्याची दुसरी वेळ होती. यासह त्याने आयपीएलमध्ये पावरप्लेमध्ये खेळताना ५० किंवा त्याहून अधिक धावा करणाऱ्या खेळाडूंच्या यादीत स्थान मिळवले. आयपीएलमध्ये पावरप्लेमध्ये सर्वाधिक वेळा ५० किंवा त्याहून अधिक धावा करणाऱ्या फलंदाजांमध्ये डेविड वॉर्नर अव्वल स्थानी आहे. त्याने आतापर्यंत ६ वेळा हा कारनामा केला आहे. तसेच, दुसऱ्या स्थानी ख्रिस गेल असून त्याने हा कारनामा ३ वेळा केला आहे. यानंतर केएल राहुल आणि सुनील नारायणसह बटलर संयुक्तरीत्या तिसऱ्या स्थानावर आहे. त्यांनी २ वेळा ही कामगिरी केली आहे.
जोस बटलरने या हंगामात ५ सामने खेळताना ६८च्या सरासरीने सर्वाधिक २७२ धावा केल्या आहेत. या धावा त्याने १५२.८१च्या स्ट्राईक रेटने चोपल्या आहेत.
आयपीएलमध्ये पावरप्लेमध्ये ५० किंवा त्याहून अधिक धावा करणारे फलंदाज
६ वेळा- डेविड वॉर्नर
३ वेळा- ख्रिस गेल
२ वेळा- जोस बटलर*
२ वेळा- केएल राहुल
२ वेळा- सुनील नारायण
महा स्पोर्ट्सचा व्हॉट्सअप ग्रुप जॉइन करण्यासाठी लिंकवर क्लिक करा
महत्वाच्या बातम्या-
एक तर एक, यादीत समावेश तर झाला! पाहा गुजरात टायटन्स संघाने असा कोणता कारनामा केलाय
