पाच वेळा आयपीएल विजेती मुंबई इंडियन्स सध्या आयपीएल 2026 मध्ये कठीण परिस्थितीत सापडलेली दिसत आहे. हंगामाची सुरुवात विजयाने केली असली, तरी त्यानंतर संघाची कामगिरी घसरलेली दिसते. दिल्ली कॅपिटल्स आणि राजस्थान रॉयल्स यांच्याकडून सलग पराभव पत्करावा लागल्याने संघाच्या कामगिरीवर प्रश्नचिन्ह निर्माण झाले आहे.
विशेष म्हणजे हे दोन्ही सामने मुंबई इंडियन्सने घराबाहेर खेळले होते. 2023 पासून संघाचा अवे सामन्यांमधील विक्रम अत्यंत निराशाजनक राहिला आहे. गेल्या तीन हंगामांत मुंबई इंडियन्सने घराबाहेर 25 सामने खेळले असून त्यापैकी केवळ 9 सामने जिंकण्यात यश आले आहे, तर 16 सामन्यांत पराभव स्वीकारावा लागला आहे. केवळ 36 टक्के विजयदर हा आयपीएलमधील इतर संघांच्या तुलनेत सर्वात खराब मानला जात आहे.
या काळात रोहित शर्मा, हार्दिक पांड्या आणि काही सामन्यांमध्ये सूर्यकुमार यादव यांनी संघाचे नेतृत्व केले आहे. 2023 मध्ये रोहित शर्मा कर्णधार होता. तर 2024 पासून हार्दिक पांड्या कर्णधारपद सांभाळत आहे. मात्र त्यांच्या नेतृत्वाखाली अवे सामन्यांमध्ये संघाची कामगिरी अपेक्षेप्रमाणे राहिलेली नाही.
राजस्थान रॉयल्सविरुद्धच्या सामन्यात तर मुंबईच्या गोलंदाजांनी अक्षरशः निराशाजनक प्रदर्शन केले. अवघ्या 11 षटकांत 150 धावा देत संघाला मोठा फटका बसला. या पराभवानंतर कर्णधार हार्दिक पांड्याने गोलंदाजांवरच नाराजी व्यक्त केली आहे.
संघात जसप्रीत बुमराह, तिलक वर्मा, मिचेल सॅन्टनर, ट्रेंट बोल्ट, शार्दुल ठाकूर आणि दीपक चाहर यांसारखे स्टार खेळाडू असूनही संघाची कामगिरी सुसंगत दिसत नाही. 2013 ते 2020 दरम्यान पाच वेळा विजेतेपद पटकावणाऱ्या या संघाची सध्याची अवस्था चाहत्यांसाठी चिंतेची बाब ठरत आहे.
प्लेऑफमध्ये पोहोचण्याची क्षमता असूनही निर्णायक क्षणी अपयश येत असल्याने मुंबई इंडियन्ससमोर मोठे आव्हान उभे आहे. आता उर्वरित सामन्यांत दमदार पुनरागमन करून ही खराब मालिका थांबवणे, हेच संघासमोरचे सर्वात मोठे उद्दिष्ट असेल.
