न्यूझीलंडविरुद्ध शनिवारी जाहीर करण्यात आलेल्या भारतीय वनडे संघात अनुभवी वेगवान गोलंदाज मोहम्मद शमीला स्थान मिळालेले नाही. सलग मालिकांमध्ये दुर्लक्षित होत असलेल्या शमीच्या आंतरराष्ट्रीय कारकिर्दीबाबत आता गंभीर प्रश्न उपस्थित होत आहेत. दुखापतीतून पूर्णपणे सावरल्यानंतरही आणि सातत्याने उत्कृष्ट कामगिरी करूनही निवड समितीचा विश्वास त्याच्यावर बसत नसल्याचं चित्र दिसत आहे.
दुखापतीनंतर पुनरागमन करत शमी सध्या बंगालकडून देशांतर्गत क्रिकेटच्या सर्व फॉरमॅटमध्ये खेळत आहे. विशेष म्हणजे तो केवळ खेळतच नाही, तर नियमितपणे विकेट्सही घेत आहे. तरीसुद्धा निवडकर्ते आणि शमी यांच्यात समन्वयाचा अभाव असल्याचं स्पष्टपणे जाणवत आहे. याच कारणामुळे चांगली कामगिरी असूनही त्याला भारतीय संघात संधी मिळत नसल्याचं बोललं जात आहे.
देशांतर्गत हंगाम 2025-26 मध्ये शमीने प्रभावी कामगिरी केली आहे. रणजी ट्रॉफीमध्ये त्याने चार सामन्यांत 18.60 च्या सरासरीने 20 विकेट्स घेतल्या. त्यानंतर सय्यद मुश्ताक अली ट्रॉफीतही त्याचा प्रभाव कायम राहिला. या टी20 स्पर्धेत शमीने सात सामन्यांत 14.93 च्या सरासरीने 16 विकेट्स घेतल्या. विजय हजारे ट्रॉफीत तो बंगालच्या वेगवान गोलंदाजी आक्रमणाचं नेतृत्व करत आहे. आकाश दीप आणि मुकेश कुमारसारखे भारतीय वेगवान गोलंदाज असतानाही शमीची भूमिका महत्त्वाची ठरत आहे. या स्पर्धेत त्याने पाच सामन्यांत 11 विकेट्स घेतल्या आहेत. एकूणच या देशांतर्गत हंगामात शमीने आतापर्यंत 16 सामन्यांत तब्बल 47 विकेट्स मिळवल्या आहेत.
इतकी दमदार कामगिरी असूनही शमीकडे पुन्हा एकदा दुर्लक्ष केलं जात आहे. त्यामुळे तो आता भारतीय संघाच्या भविष्यातील योजनांचा भाग राहिलेला नाही, असा अर्थ काढला जात आहे. मोहम्मद शमीने भारतासाठी शेवटचा आंतरराष्ट्रीय सामना गेल्या वर्षी न्यूझीलंडविरुद्धच्या चॅम्पियन्स ट्रॉफी फायनलमध्ये खेळला होता. त्या सामन्यात त्याने 9 षटकांत 74 धावा देत एक विकेट घेतली होती. त्यानंतर त्याला पुन्हा संघात स्थान मिळालेलं नाही.
शमीने भारतासाठी 64 कसोटी सामन्यांत 229 विकेट्स, 108 वनडे सामन्यांत 206 विकेट्स आणि 25 टी20 सामन्यांत 27 विकेट्स घेतल्या आहेत.
