सध्या इंग्लंडमध्ये द हंड्रेडच्या पाचव्या हंगामाचे सामने सुरू आहेत. या हंगामातील दुसरा सामना मँचेस्टर ओरिजिनल्स आणि सदर्न ब्रेव्ह यांच्यात खेळला गेला. या सामन्यात इंग्लंडचा 43 वर्षीय वेगवान गोलंदाज जेम्स अँडरसनने द हंड्रेडमध्ये पदार्पण केले. या हंगामात तो मँचेस्टर ओरिजिनल्स संघाचा भाग आहे. पण पदार्पणाच्या सामन्यात अँडरसनची जादू चालली नाही आणि तो गोलंदाजीत खूप महागडा ठरला. या सामन्यात सदर्न ब्रेव्हने मँचेस्टर ओरिजिनल्सचा एका विकेटने पराभव केला.
सामन्याबद्दल बोलायचे झाले तर सदर्न ब्रेव्हचा कर्णधार जेम्स विन्सने नाणेफेक जिंकून प्रथम गोलंदाजी करण्याचा निर्णय घेतला. प्रथम फलंदाजी करण्यासाठी आलेल्या मँचेस्टर संघाला 15 धावांवर पहिला धक्का बसला, जेव्हा मॅथ्यू हर्स्ट 3 चेंडूत 2 धावा काढून बाद झाला. त्यानंतर कर्णधार फिल साल्ट आणि जोस बटलर यांच्यात 48 धावांची भागीदारी झाली. 18 चेंडूत 22 धावा करून बटलर बाद झाला. चौथ्या क्रमांकावर फलंदाजीला आलेला हेनरिक क्लासेन काही खास कामगिरी करू शकला नाही आणि 16 चेंडूत 15 धावा काढून बाद झाला. संघाकडून फिल सॉल्टने 41 चेंडूत सर्वाधिक 60 धावा केल्या, त्यादरम्यान त्याने 4 चौकार आणि 2 षटकार मारले. त्याच वेळी, मार्क चॅपमनने 12 चेंडूत 2 षटकारांच्या मदतीने 22 धावांचे योगदान दिले. 100 चेंडू खेळल्यानंतर, मँचेस्टर संघ 4 विकेट गमावून 131 धावा करू शकला.
लक्ष्याचा पाठलाग करण्यासाठी सदर्न ब्रेव्हची सुरुवात चांगली झाली नाही. डावाच्या सुरुवातीपासूनच त्याच्या संघाचे विकेट पडत राहिले. त्यांच्या फलंदाजीचा अंदाज यावरून लावता येतो की संघाचे फक्त 4 फलंदाजच दुहेरी आकडी धावसंख्या गाठू शकले. जेसन रॉय संघाकडून सर्वाधिक धावा करणारा फलंदाज होता, त्याने 22 चेंडूत 30 धावा केल्या. त्याच्याशिवाय, लिउस डु प्लूयने 25, लॉरी इव्हान्सने 13 आणि क्रेग ओव्हरटनने 18 धावांचे योगदान दिले. सदर्न ब्रेव्हने हे लक्ष्य 99 चेंडूत गाठले.
जेम्स अँडरसनबद्दल बोलायचे झाले तर, या सामन्यात गोलंदाजी करताना तो खूप महागडा ठरला. त्याने 20 चेंडू टाकले, ज्यामध्ये त्याने 36 धावा दिल्या. त्याच्या चेंडूवर 5 चौकार आणि एक षटकार लागला. या काळात तो एकही बळी घेऊ शकला नाही. त्याची गोलंदाजी पाहिल्यानंतर त्याला आगामी सामन्यांमध्ये संधी मिळते की नाही हे पाहणे मनोरंजक ठरेल. स्कॉट करी मँचेस्टरसाठी सर्वात यशस्वी गोलंदाज होता, त्याने २० चेंडूत 28 धावा देऊन 4 बळी घेतले. त्याच्याशिवाय सोनी बेकर आणि नूर अहमद यांनी प्रत्येकी दोन बळी घेतले.
