एंडरसन-तेंडुलकर ट्रॉफी संपल्यानंतर आयसीसीने नवीन टेस्ट रँकिंग जाहीर केली आहे, ज्यामध्ये मोठे बदल पाहायला मिळत आहेत. भारतीय सुपरस्टार जसप्रीत बुमराह अजूनही नंबर 1 स्थानावर कायम आहेत. इंग्लंडच्या गस एटकिंसनलाही मोठा फायदा झाला आहे. या नवीन रँकिंगमध्ये सर्वात जास्त फायदा केनिंग्टन ओव्हल टेस्टमधील हिरो मोहम्मद सिराजला झाला आहे. तर दुसरीकडे, सुपरस्टार रवींद्र जडेजाला मोठा फटका बसला आहे.
भारतीय संघाचा वेगवान गोलंदाज मोहम्मद सिराजने केनिंग्टन ओव्हल टेस्टमध्ये एकूण 9 विकेट घेतल्या होत्या, ज्यामुळे टीम इंडियाला जबरदस्त विजय मिळवता आला. नवीन ICC टेस्ट रँकिंगमध्ये मोहम्मद सिराजला 12 स्थानांचा जबरदस्त फायदा झाला असून तो थेट 27व्या स्थानावरून 15व्या स्थानावर पोहोचला आहे. दुसरीकडे, रवींद्र जडेजाला 3 स्थानांचा तोटा झाला आहे, त्यामुळे तो आता 14व्या स्थानावरून 17व्या स्थानावर घसरला आहे. इंग्लंडचा गस एटकिंसनला 2 स्थानांचा फायदा मिळाला असून तो आता 11व्या स्थानावर पोहोचला आहे. न्यूझीलंडचा मॅट हेन्रीने झिंबाब्वे विरुद्ध चांगली कामगिरी केली होती, त्यामुळे तो आता थेट 4व्या स्थानावर झळकत आहे.
नवीन आयसीसी टेस्ट रँकिंगमध्ये वेगवान गोलंदाज प्रसिद्ध कृष्णालाही 25 स्थानांचा मोठा फायदा झाला आहे, ज्यामुळे तो आता 59व्या क्रमांकावर पोहोचला आहे. तर 6 स्थानांची घसरण झाल्यामुळे वेगवान गोलंदाज आकाशदीप आता 57व्या क्रमांकावर आहे. स्पिन ऑलराउंडर वॉशिंग्टन सुंदरलाही 6 स्थानांचा तोटा झाला असून तो आता 52व्या स्थानावर गेला आहे. इंग्लंडचा जोश टंगला 14 स्थानांचा फायदा झाला आहे आणि तो आता 46व्या क्रमांकावर आहे. तर संपूर्ण सीरीजमध्ये विश्रांतीवर असलेला कुलदीप यादव 28व्या स्थानावर स्थिर आहे.
