जम्मू आणि काश्मीर क्रिकेट संघाने पहिल्यांदाच रणजी ट्रॉफी जिंकून इतिहास रचला. यांनतर कर्णधार पारस डोग्रा अंतिम सामन्यानंतर भावनिक होताना दिसला. ६७ वर्षांच्या प्रतीक्षेनंतर जम्मू आणि काश्मीरने रणजी ट्रॉफी जिंकली. कर्नाटक क्रिकेट संघाविरुद्धचा अंतिम सामना अनिर्णित राहिला, परंतु जम्मू आणि काश्मीरने पहिल्या डावातील मोठ्या आघाडीच्या बळावर जेतेपद जिंकले.
सामन्यानंतर बोलताना पारस डोग्रा म्हणाला, “खरं सांगायचं तर, माझ्याकडे शब्द नाहीत. हा माझ्या आयुष्यातील सर्वात मोठा क्षण आहे. या संघासोबत आणि जम्मू आणि काश्मीर क्रिकेट असोसिएशनसोबत काम करण्याची संधी मिळाल्याबद्दल मी भाग्यवान आहे. हा विजय केवळ अंतिम अकरा खेळाडूंसाठी नाही तर संपूर्ण संघ आणि सपोर्ट स्टाफसाठी आहे. आम्हाला सुरुवातीपासूनच विश्वास होता की आम्ही इतिहास रचू.”
पहिल्या डावात २९१ धावांच्या मजबूत आघाडीमुळे जम्मू आणि काश्मीरने सामन्यावर मजबूत पकड मिळवली. कर्नाटकला पुनरागमन करण्याची संधी होती, परंतु जम्मू आणि काश्मीरच्या फलंदाजांनी संयमाने खेळ केला आणि ती संधी वाया घालवली. दुसऱ्या डावात ११ धावांवर दोन विकेट पडल्यानंतर काही तणाव निर्माण झाला. तथापि, कामरान इक्बालने नवीन चेंडू सावधगिरीने खेळला आणि डोग्रा आणि समद यांच्यासोबत महत्त्वाच्या भागीदारी केल्या.
यानंतर कामरान इक्बाल आणि साहिल लुथरा यांनी शतके झळकावून कर्नाटकच्या सर्व आशा संपुष्टात आणल्या. त्यांच्या शांत आणि परिपक्व फलंदाजीमुळे सामना पूर्णपणे जम्मू आणि काश्मीरच्या ताब्यात गेला.
अखेर, दुसऱ्या सत्रात पारस डोग्राने डाव घोषित करताच, जम्मू आणि काश्मीरच्या खेळाडूंमध्ये आनंदाचे वातावरण होते. या ऐतिहासिक विजयानंतर, संघ रणजी क्रिकेटमध्ये एका नवीन युगाची सुरुवात झाल्याची भावना व्यक्त करत आहे. ६७ वर्षांची प्रतीक्षा संपवून जम्मू आणि काश्मीरने भारतीय स्थानिक क्रिकेटमध्ये आपला ठसा उमटवला आहे.
