भारतात सध्या इंडियन प्रीमियर लीगचा उत्साह पाहायला मिळत आहे. जगभरातील क्रिकेट चाहते दररोज आयपीएलच्या रोमांचक सामन्यांचा आनंद घेत आहेत. तर पीएसएलचे आयोजन पाकिस्तानमध्ये होत आहे. पाकिस्तानी फलंदाज साहिबजादा फरहानने या स्पर्धेत उत्तम कामगिरी केली आहे. सोमवारी (१४ एप्रिल) इस्लामाबाद युनायटेड आणि पेशावर झल्मी यांच्यात झालेल्या सामन्यात फरहानने शतक झळकावले. या शतकी खेळीने त्याने अनेक विक्रम आपल्या नावावर केले.
नुकत्याच झालेल्या राष्ट्रीय टी-20 कपमध्ये साहिबजादा फरहानने शानदार फलंदाजी केली होती. त्या स्पर्धेत त्याने तीन शतके झळकावली. 29 वर्षीय फरहानचे या वर्षातील हे चौथे टी-20 शतक आहे. त्याने फक्त 49 चेंडूत आपले शतक पूर्ण केले. पीएसएलच्या इतिहासात इस्लामाबाद युनायटेडसाठी हे संयुक्तपणे सर्वात जलद शतक आहे. यापूर्वी, 2019 च्या आवृत्तीत दक्षिण आफ्रिकेच्या कॅमेरॉन डेलपोर्टने लाहोर कलंदर्सविरुद्ध 49 चेंडूत शतक झळकावले होते.
या शतकासह फरहानने इतिहासाच्या पानांवर आपले नाव नोंदवले. एका वर्षात चार टी-20 शतके करणारा तो पाचवा खेळाडू ठरला. या बाबतीत फरहानने भारताचा विराट कोहली, शुभमन गिल, इंग्लंडचा जोस बटलर आणि वेस्ट इंडिजचा ख्रिस गेल यांची बरोबरी केली आहे. या सर्वांच्या नावावर एका वर्षात 4 टी-20 शतके करण्याचा विश्वविक्रम आहे. हा पराक्रम करणारा तो पहिला पाकिस्तानी फलंदाज आहे. यासह त्याने बाबरचा विक्रम मागे टाकला. बाबरने 2019 आणि 2023 मध्ये टी-20 मध्ये प्रत्येकी तीन शतके ठोकली.
