“आता दीपक चहरला अधिक संधी देण्याची वेळ आलीये”

दक्षिण अफ्रिका दौऱ्यात (india tour of south africa) भारतीय संघाचे प्रदर्शन खूपच निराशाजनक राहिले. कसोटी मालिकेतील पराभवानंतर शुक्रवारी भारतीय संघाच्या हातातून एकदिवसीय मालिका देखील निसटली. एकदिवसीय मालिकेतील दुसरा सामना शुक्रवारी खेळला गेला, ज्यामध्ये दक्षिण अफ्रिकेने ७ विकेट्स राखून विजय मिळवला. भारतीय संघाचे गोलंदाजी आक्रमण या सामन्यात पूर्णपणे अपयशी ठरले. याच पार्श्वभूमीवर माजी दिग्गज कर्णधार सुनील गावसकर (Sunil Gavaskar) यांची मोठी प्रतिक्रिया आली आहे. गावसकरांनी अनुभवी वेगवान गोलंदाज भुवनेश्वर कुमारवर (Bhuvaneshear Kumar) निशाणा साधला, ज्याने दुसऱ्या सामन्यात एकही विकेट घेतली नाही.

भुवनेश्वर कुमार एकदिवसीय मालिकेती पहिल्या दोन्ही सामन्यांमध्ये खराब फॉर्ममध्ये दिसला. त्याने पहिल्या सामन्यात ६४ आणि दुसऱ्या सामन्यात ६७ धावा खर्च केल्या. या दोन्ही सामन्यात त्याला एकही विकेट घेता आली नाही. भुवनेश्वरचे प्रदर्शन पाहून गावसकरांना वाटते की त्याच्या जागी दीपक चहर (deepak chahar) याला संघात संधी दिली पाहिजे.

एका क्रीडा वृत्तसंस्थेशी बोलताना गावसकरांनी सांगितले की, भुवनेश्वर आणि दीपक एकाच प्रकारचे गोलंदाज आहे, त्यामुळे दीपकला संधी देण्याची वेळ आली आहे. ते म्हणाले की, “मला वाटते की दीपक चहरची वेळ आली आहे. तो युवा आहे, जवळपास त्याच प्रकारचा गोलंदाज आहे आणि खालच्या फळीत चांगली फलंदाजी करतो.”