भारत विरुद्ध इंग्लंड मँचेस्टर कसोटीच्या पहिल्या दिवशी रिषभ पंतच्या दुखापतीमुळे टीम इंडियाच्या अडचणी वाढल्या आहेत. 37 धावांच्या वैयक्तिक धावसंख्येवर क्रिस वोक्सचा चेंडू रिव्हर्स स्वीप करण्याचा प्रयत्न करताना पंतला दुखापत झाली. चेंडू थेट त्याच्या पायाला लागला. पंत वेदनेने कण्हत होता. फिजिओ मैदानावर आले तेव्हा त्याच्या पायाला सूज आली होती आणि थोडे रक्त आले होते. भारतीय यष्टीरक्षकाची दुखापत इतकी गंभीर होती की तो मैदानावर उभाही राहू शकत नव्हता. त्याला मिनी अॅम्ब्युलन्समधून बाहेर नेण्यात आले. चौथ्या कसोटीत इंग्लंडविरुद्ध अर्धशतक झळकावणाऱ्या साई सुदर्शनने दिवसाचा खेळ संपल्यानंतर रिषभ पंतच्या दुखापतीबद्दल अपडेट दिले आहे.
पहिल्या दिवसाचा खेळ संपल्यानंतर पत्रकार परिषदेत साई सुदर्शन म्हणाला, “त्याला नक्कीच खूप वेदना होत होत्या, पण तो स्कॅनसाठी गेला आहे. आम्हाला रात्रीतून कळेल, कदाचित उद्यापर्यंत आम्हाला माहिती मिळेल.” तो पुढे म्हणाला, “अर्थातच, त्याची खूप उणीव भासेल, कारण आजही त्याने खूप चांगली फलंदाजी केली तर आपल्याला एका फलंदाजाचीही उणीव भासेल. जर तो पुन्हा परतला नाही तर त्याचे परिणाम नक्कीच भोगावे लागतील. सध्या फलंदाजी करणारे फलंदाज आणि संघात आणखी काही अष्टपैलू खेळाडू आहेत. आम्ही आमचे सर्वोत्तम देण्याचा आणि बराच काळ फलंदाजी करण्याचा प्रयत्न करू जेणेकरून आम्ही त्याचा चांगल्या प्रकारे सामना करू शकू.”
पहिल्या दिवसाचा खेळ संपल्यानंतर, बीसीसीआयने एक्स वर रिषभ पंतच्या दुखापतीबद्दल अपडेट देताना लिहिले की, ‘मँचेस्टर कसोटीच्या पहिल्या दिवशी फलंदाजी करताना रिषभ पंतला उजव्या पायाला दुखापत झाली. त्याला स्कॅनसाठी स्टेडियममधून बाहेर नेण्यात आले. बीसीसीआयची वैद्यकीय टीम त्याच्यावर लक्ष ठेवून आहे. पंतची ही दुखापत खूपच गंभीर दिसते. दुसऱ्या दिवशी तो फलंदाजीला येऊ शकेल अशी आशा फार कमी आहे. जर तो दुसऱ्या दिवशी धोका पत्करून फलंदाजीला आला तर तो मालिकेतील शेवटच्या सामन्यातून बाहेर पडू शकतो. पहिल्या दिवसाच्या खेळाअखेर भारताने 4 विकेट गमावून 264 धावा केल्या होत्या. भारताकडून यशस्वी जयस्वाल आणि साई सुदर्शन यांनी अर्धशतके झळकावली, तर केएल राहुलने 46 धावांची खेळी केली. रवींद्र जडेजा आणि शार्दुल ठाकूर दिवसअखेरपर्यंत क्रीजवर उपस्थित होते.
