मँचेस्टर। बुधवारी(१६ सप्टेंबर) इंग्लंड विरुद्ध ऑस्ट्रेलिया संघात तिसरा वनडे सामना पार पडला. हा सामना ऑस्ट्रेलियाने ३ विकेट्सने जिंकून मालिकाही २-१ ने आपल्या नावावर केली. या सामन्यात ३०३ धावांच्या आव्हानाचा पाठलाग करताना ऍलेक्स कॅरी(१०६) आणि ग्लेन मॅक्सवेल(१०८) यांनी ऑस्ट्रेलियाकडून शतकी खेळी केली. विशेष म्हणजे ५ वर्षांनंतर ऑस्ट्रेलियाला इंग्लंडविरुद्ध वनडे मालिकेत विजय मिळवता आला आहे.
बुधवारी पार पडलेला सामना ३ सामन्यांच्या वनडे मालिकेतील निर्णायक सामना होता. कारण या सामन्याआधी दोन्ही संघांनी एक एक विजय मिळवत मालिकेत बरोबरी साधली होती. अखेर शेवटचा सामना ऑस्ट्रेलियाने जिंकून मालिकाही जिंकली. आत्तापर्यंत ५ वेळा इंग्लंड आणि ऑस्ट्रेलिया संघात निर्णायक वनडे सामना झाला आहे. त्यातील ४ वेळा ऑस्ट्रेलियाने विजय मिळवला आहे. तर १ वेळा इंग्लंडने सामना जिंकला आहे.
इंग्लंड विरुद्ध ऑस्ट्रेलिया संघात झालेल्या निर्णायक वनडे सामन्यांचा निकाल –
१९७२ – इंग्लंड विजयी
१९८१ – ऑस्ट्रेलिया विजयी
२००५ – ऑस्ट्रेलिया विजयी
२०१५ – ऑस्ट्रेलिया विजयी
२०२० – ऑस्ट्रेलिया विजयी
२०१७ पासून केवळ दुसरा पराभव –
तसेच २०१७ पासून इंग्लंडने कमीत कमी ३ सामने असलेल्या एकूण १४ वनडे द्विपक्षीय मालिका खेळल्या आहेत. विशेष म्हणजे त्यातील केवळ २ मालिकेत इंग्लंडला पराभवाचा सामना करावा लागला आहे. २०१७ ला त्यांना भारतात भारताविरुद्ध ३ सामन्यांच्या वनडे मालिकेत २-१ ने पराभूत व्हावे लागले होते. तर त्यानंतर थेट ३ वर्षांनी ते ऑस्ट्रेलियाविरुद्धची मालिका पराभूत झाले आहेत. म्हणजेच २०१७ पासून इंग्लंडला वनडे द्विपक्षीय मालिकेत (कमीतकमी ३ सामन्यांची मालिका) पराभूत करणारा ऑस्ट्रेलिया भारतानंतरचा केवळ दुसरा देश आहे.