वर्ल्ड कप सुरू होण्याला आता फक्त दोन आठवडे उरले असून, गतविजेत्या भारतीय संघाची तयारी अतिशय भक्कम दिसत आहे (ICC T20 international world cup 2026). एखाद्या हुशार विद्यार्थ्याप्रमाणे कर्णधार सूर्यकुमार यादवच्या (Suryakumar Yadav) सैन्याने मोठ्या परीक्षेसाठी स्वतःला सज्ज केले आहे. सलामीवीर अभिषेक शर्मा, टॉप ऑर्डरमध्ये ईशान किशन, मधल्या फळीत सूर्या आणि हार्दिक पांड्या, तर गोलंदाजीत बुमराह, अर्शदीप, हर्षित राणा, कुलदीप आणि वरुण चक्रवर्ती अशी भक्कम फळी भारताकडे तयार आहे.
येत्या 13 दिवसांत संघ आपल्या त्रुटी दूर करून पूर्णपणे सज्ज होईल अशी अपेक्षा आहे. मात्र, या स्पर्धेत एक असा ‘X-फॅक्टर’ आहे जो केवळ भारतासाठीच नाही तर सर्व 20 देशांसाठी डोकेदुखी ठरणार आहे, आणि तो म्हणजे ‘ड्यू’ (Dew) म्हणजेच दव.
माजी कर्णधार सुनील गावस्कर (Sunil Gavaskar) यांनी दव पडलेल्या मैदानावर पांढऱ्या चेंडूने गोलंदाजी करण्याच्या आव्हानाची तुलना ‘साबणाच्या वडी’शी (Bar of Soap) केली आहे. ओलाव्यामुळे चेंडू हाता निसरतो, ज्यामुळे वेगवान आणि फिरकी अशा दोन्ही प्रकारच्या गोलंदाजांना चेंडूवर पकड (Grip) मिळवणे कठीण जाते.
आर. अश्विन यावर म्हटले आहे की, दवामुळे दोन संघांमधील कौशल्याचा फरक कमी होतो. जर तुम्ही टॉस हरलात, तर दवामुळे गोलंदाजी करणे इतके कठीण होते की प्रतिस्पर्धी संघाला फायदा मिळतो. फेब्रुवारी ते मार्च या काळात उपखंडात उष्णता वाढेल, तेव्हा दवाची समस्या अधिक गंभीर होईल. अशा वेळी गोलंदाजांसमोर कोणत्याही फलंदाजापेक्षा दवावर नियंत्रण मिळवणे हे मोठे आव्हान असेल.
माजी फिरकीपटू हरभजन सिंग (टर्बनेटर) याने या समस्येवर एक उपाय सुचवला आहे. भज्जीच्या मते, चेंडू ओला झाला की वेगवान गोलंदाजांनाही अचूक मारा करणे अशक्य होते. पण बुमराह, अर्शदीप, कुलदीप आणि वरुण चक्रवर्ती यांसारखे ‘मॅचविनर’ गोलंदाज अशा परिस्थितीतही विकेट काढू शकतात. त्यामुळे भारताने 8 व्या क्रमांकावर फलंदाज खेळवण्याऐवजी 5 स्पेशालिस्ट (तज्ज्ञ) गोलंदाजांसह मैदानात उतरावे.
