केरळ येथे जन्मलेला वेगवान गोलंदाज संदीप वाॅरियर भारतीय क्रिकेटच्या क्षितिजावरील उगवत्या ताऱ्यांपैकी एक आहे. भारताच्या स्थानिक क्रिकेटमध्ये गेली काही वर्षे तो सातत्यपूर्ण प्रदर्शन करून लक्ष वेधून घेत आहे. त्याचेच फळ म्हणून ५ फेब्रुवारीपासून इंग्लंडविरुद्ध सुरु होणाऱ्या कसोटी मालिकेसाठी संदीपची भारतीय संघात नेट बॉलर म्हणून निवड करण्यात आली आहे.
मात्र आता याबाबत एक नवीन माहिती समोर येत आहे. स्थानिक क्रिकेटमध्ये तामिळनाडू संघाकडून खेळत असलेल्या संदीपला रिलीज करण्याबाबत तामिळनाडूचा संघ उत्सुक नसल्याचे समोर आले आहे. देशांतर्गत क्रिकेटचा भाग असणाऱ्या सय्यद मुश्ताक अली स्पर्धेच्या बाद फेरीला सुरुवात होत असल्याने तामिळनाडूचा संघ हा निर्णय घेत असल्याचे म्हंटले जात आहे.
माध्यमातील वृत्तांनुसार तामिळनाडू संघाने संदीपला बायो बबलमध्ये उशिरा प्रवेश देण्यात यावा, अशी मागणी बीसीसीआयकडे केली असल्याचे समजते आहे. तामिळनाडू क्रिकेट असोसिएशनच्या एका वरिष्ठ पदाधिकाऱ्याने आम्ही बीसीसीआयच्या उत्तराची वाट पाहत आहोत, असे सांगितले. बीसीसीआयकडून आम्हाला सकारात्मक प्रतिसादाची अपेक्षा आहे, असेही हा अधिकारी म्हणाला.
सद्यस्थितीत सय्यद मुश्ताक अली स्पर्धेच्या साखळी फेरीत उत्तम कामगिरी केल्याने तामिळनाडूचा संघ बाद फेरीत पोहोचला आहे. तामिळनाडूने आपले आत्तापर्यंतचे पाचही सामने जिंकले असून संदीप वाॅरियर त्यांच्या संघाचा महत्वाचा भाग आहे. त्याने पाच सामन्यात पाच बळी घेतले आहेत.
दरम्यान, जर तामिळनाडूचा संघ सय्यद मुश्ताक अली स्पर्धेच्या अंतिम फेरीत पोहोचला तर ते आपला शेवटचा सामना ३१ जानेवारी रोजी खेळतील. अशा परिस्थितीत संदीपला १ फेब्रुवारीपासून बायो बबलमध्ये प्रवेश मिळावा, अशी मागणी तामिळनाडू क्रिकेट असोसिएशानने केली आहे. त्यावर आता बीसीसीआय काय उत्तर देणार, याकडे सगळ्यांचे लक्ष आहे.
महत्वाच्या बातम्या:
एकाच चेंडूवर फलंदाज दोनदा रन आउट? पाहा बिग बॅश लीगमधील धमाल व्हिडिओ
क्या से क्या हो गया! दहा दिवसांपूर्वी ऑस्ट्रेलियाचे नेतृत्व करणारा टीम पेन झाला वॉटर बॉय