दुलीप ट्रॉफी २०२६ प्रथम श्रेणी (फर्स्ट-क्लास) स्पर्धेला २३ ऑगस्टपासून सुरुवात होणार आहे. या स्पर्धेत ६ संघ भाग घेणार असून, त्यांची नावे वेस्ट झोन, ईस्ट झोन, साउथ झोन, नॉर्थ झोन, नॉर्थ-ईस्ट झोन आणि सेंट्रल झोन अशी आहेत. आता साउथ झोन संघाची घोषणा झाली असून, त्याचे कर्णधारपद तिलक वर्माकडे सोपवण्यात आले आहे. तर आंध्रचा फलंदाज रिकी भुई संघाचा उपकर्णधार असेल.
तिलक वर्मा एखाद्या संघाचे नेतृत्व करत असण्याची ही पहिलीच वेळ नाही. याआधी त्याने हैदराबाद संघ आणि ‘इंडिया ए’चे नेतृत्व देखील केले आहे. साउथ झोनच्या संघात करुण नायर, श्रेयस गोपाल आणि एन. जगदीशन यांसारखे नामवंत क्रिकेटपटूही समाविष्ट आहेत.
तिलक वर्मा भारतीय टी-२० संघाचा नियमित भाग आहे आणि संघाचा उपकर्णधारही आहे. गेल्या वर्षी दुलीप ट्रॉफीमध्ये तिलक वर्मा खेळला नव्हता, तेव्हा संघाचे नेतृत्व मोहम्मद अझरुद्दीनने केले होते; जो या वेळी संघाचा भाग नाही. तिलकने आतापर्यंत आपल्या २३ सामन्यांच्या प्रथम श्रेणी कारकिर्दीत ७ शतकांसह १५६२ धावा केल्या आहेत.
दुलीप ट्रॉफीला २३ ऑगस्टपासून सुरुवात होणार असून अंतिम सामना ६ सप्टेंबरला सुरू होईल. गेल्या वर्षी अंतिम फेरीत पोहोचलेल्या साउथ झोन आणि सेंट्रल झोनला थेट उपांत्य फेरीत प्रवेश मिळाला आहे. तर उपांत्यपूर्व फेरीत ईस्ट झोनची लढत नॉर्थ-ईस्ट झोनशी, आणि दुसऱ्या उपांत्यपूर्व सामन्यात नॉर्थ झोनची लढत वेस्ट झोनशी होईल.
