भारतीय क्रिकेट संघाचे मुख्य प्रशिक्षक गौतम गंभीर आणि माजी कर्णधार विराट कोहली यांच्यातील नातेसंबंध गेल्या काही महिन्यांपासून चर्चेचा विषय ठरत आहेत. आयपीएलदरम्यान दोघांमध्ये झालेल्या वादामुळे गंभीर भारतीय संघाचे प्रशिक्षक होण्यापूर्वीच त्यांच्या समन्वयाबाबत प्रश्न उपस्थित झाले होते. सुरुवातीला सर्व काही सुरळीत असल्याचे दिसत होते, मात्र बॉर्डर-गावस्कर ट्रॉफीनंतर विराट कोहलीने कसोटी क्रिकेटमधून निवृत्ती जाहीर केल्यानंतर या चर्चांना पुन्हा उधाण आले.
गेल्या काही काळात नेट प्रॅक्टिस सत्रांदरम्यान कोहली आणि गंभीर एकमेकांशी संवाद टाळत असल्याचे, तसेच न्यूझीलंडविरुद्धच्या एका वनडे सामन्यात ड्रेसिंग रूममध्ये कोहली गंभीरकडे दुर्लक्ष करत असल्याचे दृश्य दिसून आले होते. यामुळे दोघांमधील नात्यात तणाव असल्याच्या अफवा पसरल्या.
मात्र भारतीय क्रिकेट नियामक मंडळाचे (BCCI) सचिव देवजीत सैकिया यांनी या सर्व अफवांना पूर्णविराम दिला आहे. त्यांनी स्पष्ट केले की विराट कोहली आणि गौतम गंभीर यांच्यात सौहार्दपूर्ण संबंध आहेत आणि कोणताही वाद नाही. इंडिया टुडे पॉडकास्टमध्ये बोलताना सैकिया म्हणाले, “मी त्यांना कधीच भांडताना पाहिलेलं नाही. त्यांच्यात अतिशय चांगले आणि सौहार्दपूर्ण संबंध आहेत.”
2023 आयपीएलमधील घटनेबाबत विचारले असता सैकिया म्हणाले, “मी तो सामना पाहिला नव्हता. कदाचित त्या वेळी मी देशासाठी खेळताना त्यांच्यासोबत होतो. आयपीएलमधील प्रत्येक सामना पाहणे शक्य नसते.”
गंभीर कोहलीला संघाबाहेर करण्याचा प्रयत्न करत आहेत का, या प्रश्नावर सैकियांनी ठाम भूमिका घेतली. ते म्हणाले, “ही केवळ एक धारणा असू शकते. विराट कोहली कायम संघात असेल. गौतम गंभीरही संघाचाच भाग आहेत. आम्ही निकाल पाहतो. तुम्ही कधी विराट कोहलीला संघाबाहेर पाहिलं आहे का?”
कोहलीच्या कसोटी निवृत्तीबाबत स्पष्टीकरण देताना सैकिया म्हणाले, “विराट कोहलीसारख्या खेळाडूला कोणताही निर्णय घेण्यासाठी कोणीही भाग पाडू शकत नाही. तो भारतीय क्रिकेटचा दिग्गज आहे. जोपर्यंत तो स्वतः निर्णय घेत नाही, तोपर्यंत कोणीही त्याच्यावर दबाव आणू शकत नाही. बोर्ड कोणत्याही खेळाडूच्या कारकिर्दीत हस्तक्षेप करणार नाही.”
