भारतीय क्रिकेट संघाचा माजी वेगवान गोलंदाज आणि सध्या लखनऊ सुपर जायंट्सचा मार्गदर्शक असलेला झहीर खान आता वडील झाला आहे. त्याची पत्नी, अभिनेत्री सागरिका घाटगे यांनी नुकताच एका गोंडस मुलाला जन्म दिला आहे. या आनंददायी बातमीची माहिती खुद्द झहीर खान आणि सागरिका यांनी सोशल मीडियाच्या माध्यमातून आपल्या चाहत्यांसोबत शेअर केली.
या नवजात बाळाचे नाव ‘फतेह सिंग खान’ असे ठेवण्यात आले असून, सागरिका यांनी आपल्या इन्स्टाग्राम पोस्टमध्ये याची अधिकृत घोषणा केली आहे. त्यांच्या पोस्टमध्ये काही फोटोही समाविष्ट होती, ज्यामध्ये झहीर आणि सागरिका आपल्या बाळासोबत आनंदाचे क्षण घालवत असल्याचे दिसते.
झहीर आणि सागरिका यांचे लग्न 2017 मध्ये झाले होते. विविध धर्मांतील असूनही, त्यांनी प्रेम आणि परस्पर समजूतदारपणावर आधारलेला निर्णय घेत विवाहबंधनात अडकण्याचा निर्णय घेतला होता. आता लग्नाच्या आठ वर्षांनंतर हे जोडपे पालक झाले आहे.
क्रिकेट क्षेत्रात झहीर खान यांचे योगदान मोठे आहे. सध्या तो इंडियन प्रीमियर लीगमध्ये लखनऊ सुपर जायंट्स संघाचा मार्गदर्शक म्हणून कार्यरत आहे. चालू हंगामात लखनऊ संघाने 7 पैकी 4 सामने जिंकले आहेत, तर 3 सामने गमावले आहेत. झहीर खान आणि सागरिका घाटगे यांना त्यांच्या नव्या वाटचालीसाठी अनेकांकडून शुभेच्छा मिळत आहेत.
