किती हे दुर्दैव..! पहिल्यांदाच आयपीएलमध्ये संधी मिळालेला खेळाडू एकही डाव न खेळता हंगामातून बाहेर

कोलकाता नाईट रायडर्स (केकेआर) संघाला इंडियन प्रीमियर लीग (आयपीएल) २०२०ची सुरुवात होण्यापूर्वी मोठा झटका बसला होता. त्यांचा दमदार वेगवान गोलंदाज हॅरी गर्नी दुखापतीमुळे आयपीएलमधून बाहेर पडला होता. पण कोलकाता संघाने अमेरिका क्रिकेट संघाच्या अली खानची निवड करत गर्नीची उणीव भरुन काढली होती. मात्र आता हा वेगवान गोलंदाज एकही सामना न खेळता पूर्ण हंगामातून बाहेर पडला आहे.

माध्यमांतील वृत्तांनुसार, अली खानला नेट्समध्ये सराव करताना दुखापती झाल्या आहेत, ज्या लवकर नीट होण्याची लक्षणे दिसत नाहीत. त्यामुळे अली आयपीएल २०२०च्या पूर्ण हंगामातून बाहेर झाला आहे.

अलीचा जन्म १३ डिसेबंर १९९० रोजी पाकिस्तानच्या पंजाब प्रांतात झाला होता. त्याने अमेरिका क्रिकेट संघाकडून आतापर्यंत केवळ १ वनडे सामना खेळला आहे. हा सामना २७ एप्रिल २०१९ला पपुआ न्यू गिनी संघाविरुद्ध खेळण्यात आला होता. त्यात त्याने ४.६०च्या इकोनॉमी रेटने १ विकेट चटकावली होती.

तर अ दर्जाच्या क्रिकेटमध्ये त्याने ९ सामने खेळत २३ विकेट्स घेतल्या होत्या. देशांतर्गत स्तरावरील टी२० क्रिकेटमधील त्याची आकडेवारी उल्लेखनीय आहे. त्याने ३६ देशांतर्गत टी२० सामने खेळत ३८ विकेट्सची आपल्या खात्यात नोंद केली होती. तसेच यावर्षीच्या सीपीएल हंगामातही अलीने फलंदाजांना मोठ्या संकटात टाकले होते. त्याने आपल्या वेगवान गोलंदाजीने फलंदाजांना सतावत ८ विकेट्सची खात्यात नोंद केली होती. तो सीपीएल २०२०च्या विजेत्या ट्रिबँगो नाईट रायडर्स संघाचा भाग होता.