आयसीसी आणि बांगलादेश क्रिकेट बोर्ड (BCB) यांच्यातील मतभेदांमुळे काही दिवसांपासून चर्चेत असलेल्या टी20 वर्ल्ड कप 2026 च्या वॉर्मअप सामन्यांचे वेळापत्रक अखेर जाहीर करण्यात आले आहे. या वादामुळे वॉर्मअप शेड्यूल जाहीर होण्यास विलंब झाला होता. आता आयसीसीने अधिकृत घोषणा करत एकूण 15 वॉर्मअप सामने खेळवले जाणार असल्याचे स्पष्ट केले आहे. हे सामने 2 फेब्रुवारी ते 6 फेब्रुवारी या कालावधीत होतील, तर मुख्य टी20 वर्ल्ड कप स्पर्धेला 7 फेब्रुवारीपासून सुरुवात होणार आहे.
या वादाचा मोठा परिणाम बांगलादेश संघाला भोगावा लागला आहे. बांगलादेश क्रिकेट बोर्डने सुरक्षेचे कारण देत आपला संघ भारतात पाठवण्यास नकार दिला होता. त्यामुळे आयसीसीने बांगलादेशऐवजी स्कॉटलंड संघाला वॉर्मअप सामन्यांमध्ये सहभागी करून घेतले आहे. स्कॉटलंडसाठी हे सामने अत्यंत महत्त्वाचे ठरणार आहेत, कारण त्यांना थेट स्पर्धेपूर्वी फारशी तयारीची संधी मिळालेली नाही.
टीम इंडियाला वर्ल्ड कपपूर्वी तीन वॉर्मअप सामने खेळण्याची संधी मिळणार आहे. भारतीय संघाचा पहिला वॉर्मअप सामना 2 फेब्रुवारी रोजी अमेरिकेविरुद्ध (USA) होणार आहे. त्यानंतर 4 फेब्रुवारीला दक्षिण आफ्रिकेविरुद्ध आणि 6 फेब्रुवारीला नामीबियाविरुद्ध भारत आपला शेवटचा सराव सामना खेळणार आहे. मुख्य स्पर्धेपूर्वी संघाची तयारी तपासण्यासाठी हे सामने महत्त्वाचे मानले जात आहेत.
टी20 वर्ल्ड कप 2026 चे वॉर्मअप सामने बेंगळुरू, चेन्नई, नवी मुंबई आणि कोलंबो येथे खेळवले जाणार आहेत. वॉर्मअप सामन्यांची सुरुवात 2 फेब्रुवारी रोजी अफगाणिस्तान विरुद्ध स्कॉटलंड या लढतीने होणार आहे. त्याच दिवशी भारताचाही पहिला सामना खेळवला जाणार असल्याने क्रिकेट चाहत्यांसाठी हा दिवस विशेष ठरणार आहे.
टी20 वर्ल्ड कप 2026 – वॉर्मअप सामन्यांचे वेळापत्रक
2 फेब्रुवारी – अफगाणिस्तान विरुद्ध स्कॉटलंड
2 फेब्रुवारी – भारत विरुद्ध USA
2 फेब्रुवारी – कॅनडा विरुद्ध इटली
3 फेब्रुवारी – श्रीलंका विरुद्ध ओमान
3 फेब्रुवारी – नेदरलँड्स विरुद्ध झिम्बाब्वे
3 फेब्रुवारी – नेपाळ विरुद्ध UAE
4 फेब्रुवारी – नामीबिया विरुद्ध स्कॉटलंड
4 फेब्रुवारी – अफगाणिस्तान विरुद्ध वेस्ट इंडीज
4 फेब्रुवारी – आयर्लंड विरुद्ध पाकिस्तान
4 फेब्रुवारी – भारत विरुद्ध दक्षिण आफ्रिका
5 फेब्रुवारी – ओमान विरुद्ध झिम्बाब्वे
5 फेब्रुवारी – कॅनडा विरुद्ध नेपाळ
5 फेब्रुवारी – न्यूझीलंड विरुद्ध USA
6 फेब्रुवारी – इटली विरुद्ध UAE
6 फेब्रुवारी – भारत विरुद्ध नामीबिया
वॉर्मअप सामन्यांनंतर लगेचच टी20 वर्ल्ड कप 2026 चा थरार रंगणार असून, सर्व संघांची अंतिम तयारी या सामन्यांतून स्पष्ट होणार आहे.
