आयपीएलच्या १३व्या हंगामाला शनिवारी मुंबई इंडियन्स विरुद्ध चेन्नई सुपर किंग्ज यांच्यातील सामन्याने संयुक्त अरब अमिरातीमध्ये सुरुवात झाली. चेन्नईने या सामन्यात ५ विकेट्सने मुंबईवर शानदार विजय मिळवला. या सामन्यानंतर रविवारी दिल्ली कॅपिटल्स विरुद्ध किंग्ज ११ पंजाब संघात आयपीएलचा दुसरा सामना दुबई आंतरराष्ट्रीय स्टेडियम, दुबई येथे खेळण्यात येत आहे.
या सामन्यापुर्वी पंजाबचा कर्णधार केएल राहुलने नाणेफेक जिंकत प्रथम क्षेत्ररक्षणाचा निर्णय घेतला. त्यामुळे दिल्लीचा संघ पहिल्यांदा फलंदाजीसाठी मैदानावर उतरला. गतवर्षीची ठरलेली शिखर धवन आणि पृथ्वी शॉची सलामीची जोडी फलंदाजीसाठी मैदानावर आली. पण दूसऱ्या षटकातच संघाला मोठा धक्का बसला. दूसऱ्या षटकातील चौथ्या चेंडूवर धवन शून्य धावेवर धावबाद झाला.
धवन नंतर चौथ्या षटकातील तिसऱ्या चेंडूवर दिल्लीचा वेगवान गोलंदाज मोहम्मद शमीने शॉ आणि सहाव्या चेंडूवर शिमरॉन हेटमायरला पव्हेलियनचा रस्ता दाखवला. त्यामुळे चौथ्या षटकापर्यंत दिल्लीचा स्कोर ३ बाद १३ धावा इतकाच झाला.
त्यानंतर दिल्लीचा कर्णधार श्रेयस अय्यर आणि यष्टीरक्षक फलंदाज रिषभ पंत फलंदाजीसाठी मैदानावर उतरले. दोघांनीही संघाचा डाव सावरत १३व्या षटकापर्यंत ६३ धावांची दमदार भागिदारी केली. परंतु पुढील षटकातील सहाव्या चेंडूवर युवा गोलंदाज रवि बिश्नोईने पंतला त्रिफळाचीत केले. त्यामुळे पंत २९ चेंडूंत फक्त ३१ धावा करत पव्हेलियनला परतला.
पंतपाठोपाठ शमीने अय्यरलाही झेलबाद करत डाव आपल्या बाजूने करुन घेतला. अय्यर ३२ चेंडूंवर ३९ धावा करत क्रिस जॉर्डनच्या हातून झेलबाद झाला. अशाप्रकारे दिल्लीचा डाव सावरत असणाऱ्या २ दमदार फलंदाजांना पंजाबच्या गोलंदाजाने एकापाठोपाठ बाद केले.
पण पहिल्यांदा दिल्लीच्या ताफ्यात दाखल झालेल्या ऑस्ट्रेलियाच्या मार्कस स्टोइनिसने ६व्या क्रमांकावर फलंदाजीला येत दमदार प्रदर्शन केले. त्याने केवळ २१ चेंडूत ७ चौकार आणि ३ षटकार मारत ५३ धावांची अफलातून खेळी केली आणि सामन्याचा कायापालट केला.
त्यामुळे दिल्लीचा डाव २० षटकात ८ विकेट्स गमावत १५७ धावांवर संपला. दरम्यान शमीने गोलंदाजी करताना सर्वाधिक ३ विकेट्स घेतल्या. तर शेल्ड कॉट्रेलने २ आणि बिश्नोईने १ विकेट चटकावली. आता पंजाब दिल्लीच्या १५८ धावांचे आव्हान पूर्ण करेल का नाही?, हे पाहणे रोमांचक ठरेल.
महत्त्वाच्या बातम्या-
-षटकार- चौकारांची बरसात करत मार्कस स्टोयनीसने केला अजब कारनामा
-इकडे आयपीएल सुरु असताना ‘त्याने’ तिकडे क्रिकेटमध्येच रचला अनोखा इतिहास
-पहिल्या सामन्यातील ‘किंग’ समजल्या जाणाऱ्या खेळाडूला पंजाबने दाखवला बाहेरचा रस्ता
ट्रेंडिंग लेख-
-यावर्षी सीएसकेसाठी एक्स फॅक्टर ठरू शकतो ‘हा’ अष्टपैलू खेळाडू
-२२ व्या वर्षी दिग्गजांच्या पंक्तीत सामील झालेला राशिद खान
-वाढदिवस विशेष: राशिद खान विषयी माहित नसलेल्या ५ खास गोष्टी…