भारत आणि इंग्लंड यांच्यातील पाच सामन्यांच्या कसोटी मालिकेतील दुसरा सामना एजबेस्टनच्या मैदानावर खेळवला जाणार आहे. या सामन्यासाठी भारतीय संघात काही बदल पाहायला मिळू शकतात. लीड्स कसोटीत शानदार गोलंदाजी करणारा जसप्रीत बुमराह दुसऱ्या कसोटीत खेळेल की नाही, याबाबत सध्या साशंकता आहे. मालिकेच्या सुरुवातीपूर्वीच बुमराहने टीम मॅनेजमेंटला सांगितले होते की, तो इंग्लंड दौऱ्यात केवळ तीन कसोटी सामने खेळू शकेल.
अशा परिस्थितीत, जर बुमराह विश्रांती घेत असेल, तर दुसऱ्या कसोटीत त्याऐवजी कोणाला संधी दिली जाईल, हा सर्वात मोठा प्रश्न आहे. या शर्यतीत डावखुरा वेगवान गोलंदाज अर्शदीप सिंग आणि आकाश दीप यांची नावं आघाडीवर आहेत.
अर्शदीप सिंगने भारतासाठी अजून एकही कसोटी सामना खेळलेला नाही. त्यामुळे जर त्याला दुसऱ्या कसोटीत संधी मिळाली, तर हा त्याचा कसोटी पदार्पणाचा सामना ठरेल. अर्शदीप उत्कृष्ट स्विंग आणि वेगाने फलंदाजांना त्रास देण्याची क्षमता ठेवतो. मात्र, इंग्लंडमध्ये त्याचा रेड बॉल क्रिकेटमधील अनुभव फारसा प्रभावी ठरलेला नाही.
2023-24 च्या काउंटी क्रिकेट हंगामात अर्शदीप सिंगने केंटकडून खेळताना 5 सामने खेळले. त्याने या सामन्यांमध्ये एकूण 13 विकेट्स घेतल्या, आणि त्याचा गोलंदाजीचा सरासरी 41.8 होती. त्याने 8 डावांमध्ये 31 मेडन ओव्हर्स टाकले आणि 6 नो बॉल्स देखील फेकल्या. हे आकडे पाहता, त्याला दुसऱ्या कसोटीत थेट संधी मिळेल का, हे सांगणं कठीण आहे.
तथापि, अर्शदीपच्या एकूण फर्स्ट क्लास कारकिर्दीकडे नजर टाकल्यास त्याची कामगिरी समाधानकारक आहे. त्याने आतापर्यंत 21 फर्स्ट क्लास सामने खेळून 30.37 च्या सरासरीने 66 विकेट्स घेतल्या आहेत. यात दोन वेळा पाच विकेट्सचा पराक्रमही समाविष्ट आहे.
आता सर्वांच्या नजरा या गोष्टीकडे लागलेल्या आहेत की, शुबमन गिलच्या नेतृत्वाखालील भारतीय संघ दुसऱ्या कसोटीत कोणत्या प्लेइंग इलेव्हनसह मैदानात उतरेल. जसप्रीत बुमराह जर खेळत नसेल, तर अर्शदीप किंवा आकाश दीप यापैकी कोणाला संधी मिळते हे पाहणे रंजक ठरेल.
