आशिया कप 2025 9 सप्टेंबरपासून सुरू होत आहे. या स्पर्धेत सर्वांचे लक्ष 14 तारखेला होणाऱ्या भारत विरुद्ध पाकिस्तान सामन्यावर आहे. एकीकडे चाहते आणि अनेक माजी क्रिकेटपटू म्हणतात की भारताने पाकिस्तानविरुद्धच्या सामन्यावर बहिष्कार टाकावा. त्याच वेळी, सरकारने स्पष्ट केले आहे की भारत पाकिस्तानसोबत द्विपक्षीय मालिका खेळणार नाही, परंतु आशिया कप आणि इतर बहुपक्षीय स्पर्धांमध्ये भाग घेईल. अशा परिस्थितीत, आता बोर्डाला निर्णय घ्यावा लागेल की भारत पाकिस्तानविरुद्ध सामना खेळेल की नाही.
या वर्षी एप्रिलमध्ये झालेल्या पुलवामा हल्ल्याच्या पार्श्वभूमीवर पाकिस्तानच्या सामन्यावर बहिष्कार टाकण्याची चर्चा केली जात आहे. पाकिस्तानमधील दहशतवाद्यांनी धर्माच्या नावाखाली 26 जणांची हत्या केली. तथापि, भारताने ऑपरेशन सिंदूरद्वारे शेजारी देशाला चोख प्रत्युत्तर दिले.
माजी क्रिकेटपटू व राजकारणी मनोज तिवारीने पाकिस्तानविरुद्ध सामन्याच्या बहिष्काराची मागणी केली आहे. त्याने म्हटलं की, “जेव्हा आपणास ठाऊक आहे की दहशतवादी पाकिस्तानहूनच येतात, आणि पाकिस्तान सरकार आपल्या भूमीत वाढणाऱ्या दहशतवादी संघटनांना कधीच आळा घालत नाही, तेव्हा अशा देशाविरुद्ध खेळण्याचा अर्थच काय? भारताने पाकिस्तानविरुद्धचा सामना बहिष्कृत करावा आणि उर्वरित सामने जिंकून ठोस संदेश द्यावा.”
तिवारीने प्रश्न उपस्थित केला की पाकिस्तानविरुद्ध खेळून भारताला नेमकं काय लाभणार? त्याने स्पष्टपणे म्हटलं –
“यातून फक्त टीआरपी आणि महसूल मिळतो. पण जर आयसीसी त्यांच्यावर कारवाई करू शकत नसेल, तर भारताने किमान या सामन्यापासून दूर राहून देशाचं स्थान स्पष्ट करावं.”
तिवारी पुढे म्हणाला, “काही महिन्यांपूर्वीच पहलगाम हल्ला झाला. त्याआधी पुलवामा. अशा घटनांमध्ये शहीदांच्या कुटुंबियांची मानसिकता काय असेल याचा विचार केला पाहिजे. एक सैनिक आपल्या देशासाठी प्राण देतो आणि आपण मात्र खेळभावनेच्या नावाखाली त्या देशाविरुद्ध सामना खेळतो जिथून दहशतवादी येतात, हे योग्य नाही.”
