इंडियन प्रीमियर लीगचा (IPL) पुढील सीझन म्हणजेच आयपीएल 2027 पुढील वर्षी खेळवला जाणार आहे. सध्या आयपीएलच्या पुढील सीझनचे वेळापत्रक जाहीर झालेले नाही, परंतु जगातील ही सर्वात मोठी लीग मार्च ते मे दरम्यानच खेळवली जाईल. ऑस्ट्रेलियन क्रिकेट संघाला ऑगस्ट 2026 ते ऑगस्ट 2027 दरम्यान प्रचंड क्रिकेट खेळायचे आहे. पुढील एका वर्षात ऑस्ट्रेलियन संघाला 20 कसोटी आणि १४ मर्यादित षटकांचे सामने खेळायचे आहेत. अशा परिस्थितीत ऑस्ट्रेलियन खेळाडू आयपीएल 2027 मधून माघार घेऊ शकतात. याचे संकेत संघाच्या मुख्य प्रशिक्षकांनी दिले आहेत.
ऑस्ट्रेलियाचे मुख्य प्रशिक्षक अँड्र्यू मॅकडोनाल्ड यांनी संकेत दिले आहेत की, ऑस्ट्रेलियाच्या प्रमुख कसोटी क्रिकेटपटूंना पुढील वर्षी होणाऱ्या आयपीएलमधील आपल्या सहभागाबाबत कठीण निर्णय घ्यावे लागू शकतात, कारण संघ त्यांच्या आंतरराष्ट्रीय कॅलेंडरमधील सर्वात व्यस्त टप्प्यांपैकी एकासाठी तयारी करेल. ऑस्ट्रेलियाला पुढील 12 महिन्यांत 20 कसोटी आणि 14 व्हाईट-बॉल आंतरराष्ट्रीय सामने खेळायचे आहेत. यामध्ये भारतात होणाऱ्या पाच सामन्यांच्या कसोटी मालिकेचाही समावेश आहे. कसोटी क्रिकेटच्या 150 व्या वर्धापन दिनानिमित्त इंग्लंडविरुद्ध ऑस्ट्रेलिया एक कसोटी सामना खेळणार आहे, तर कांगारूंची एशेज मालिकेतही इंग्लिश संघाशी गाठ पडणार आहे.
आयपीएल 2027 पुढील वर्षी मार्च ते मे अखेरपर्यंत खेळवले जाईल. तर जूनमध्ये वर्ल्ड टेस्ट चॅम्पियनशिपचा (WTC) फायनल सामना होण्याची शक्यता आहे. अशा स्थितीत ऑस्ट्रेलियाचे प्रमुख खेळाडू आयपीएल 2027 ला मुकण्याची शक्यता आहे किंवा ते फक्त काही सामने खेळू शकतात.
मॅकडोनाल्ड यांनी ‘ईएसपीएन क्रिकइन्फो’ला सांगितले, “मी आधीही सांगितले आहे की आयपीएल आमच्या अनेक खेळाडूंच्या मॅनेजमेंट प्लॅनचा एक भाग आहे आणि माझ्या मते टी२० क्रिकेटच्या सर्वात चांगल्या स्पर्धेत आमच्या सर्वोत्तम खेळाडूंना खेळण्याची संधी मिळाल्याने त्यांच्या कामगिरीतही फायदा होतो. फक्त तुम्हाला यामध्ये योग्य समतोल साधावा लागेल.” मॅकडोनाल्ड पुढे म्हणाले, “मला माहीत आहे की लोक देश विरुद्ध फ्रँचायझी आणि अशा गोष्टी बोलतात, पण या क्षणी महत्त्वाची गोष्ट म्हणजे आम्ही आमच्या वेगवान गोलंदाजांना त्यांच्या शरीराला विश्रांती देण्याची आणि ज्या 20 किंवा 21 सामन्यांबद्दल सगळे बोलतात, त्यात आपली सर्वोत्तम कामगिरी करण्यासाठी तयार होण्याची संधी देत आहोत.”
पॅट कमिन्स, मिचेल स्टार्क, जोश हेझलवूड, कॅमेरॉन ग्रीन आणि ट्रॅव्हिस हेड हे त्या ऑस्ट्रेलियन खेळाडूंपैकी आहेत जे सध्या आयपीएल फ्रँचायझींशी जोडलेले आहेत, तर जोश इंग्लिस देखील लखनौ सुपर जायंट्स संघाचा भाग आहे. ऑस्ट्रेलियाच्या नियमित कसोटी खेळाडूंनी स्पर्धेतून माघार घेण्याचा किंवा आपली उपलब्धता मर्यादित करण्याचा घेतलेला कोणताही निर्णय फ्रँचायझींच्या नियोजनावर परिणाम करू शकतो, विशेषतः खेळाडूंना रिटेन करण्याच्या बाबतीत.
