भारतीय फुटबॉल संघाच्या नवीन प्रशिक्षकाची घोषणा करण्यात आली आहे. खालिद जमील हे वरिष्ठ भारतीय पुरुष फुटबॉल संघाचे मुख्य प्रशिक्षक बनले आहेत. एआयएफएफ कार्यकारी समितीने तांत्रिक समितीच्या उपस्थितीत त्यांच्या नियुक्तीला मान्यता दिली आहे. 13 वर्षांनंतर भारतीय फुटबॉल संघाला भारतीय प्रशिक्षक मिळाला आहे. त्यांच्यापूर्वी 2011-12 मध्ये भारताचे सॅव्हियो मेडेरा भारतीय संघाचे प्रशिक्षक होते.
मनोल मार्केझ यांनी गेल्या महिन्यात भारतीय फुटबॉलच्या मुख्य प्रशिक्षकपदाचा राजीनामा दिला. त्यांच्या कार्यकाळात भारतीय फुटबॉल संघाला चांगली कामगिरी करता आली नाही. आता खालिद जमील त्यांची जागा घेतील. जमीलशिवाय स्टीफन कॉन्स्टँटाईन आणि स्लोवाकियाचे व्यवस्थापक स्टीफन तारकोविक हे मुख्य प्रशिक्षकपदाच्या शर्यतीत होते. पण शेवटी जमील जिंकले.
The AIFF Executive Committee, in the presence of the Technical Committee, has approved the appointment of Khalid Jamil as the new head coach of the Senior India Men's National Team.#IndianFootball ⚽️ pic.twitter.com/R1FQ61pyr4
— Indian Football Team (@IndianFootball) August 1, 2025
कुवेतमध्ये जन्मलेले 49 वर्षीय खालिद जमील यांनी खेळाडू म्हणून (2005 मध्ये महिंद्रा युनायटेडसह) आणि प्रशिक्षक म्हणून (2017 मध्ये ऐझॉल एफसीसह) भारताचे अव्वल विभागीय विजेतेपद जिंकले आहेत. त्यांनी सलग दोन वर्षे (2023-24, 2024-25) एआयएफएफकडून वर्षातील सर्वोत्तम पुरुष प्रशिक्षकाचा पुरस्कार जिंकला. भारतीय फुटबॉल संघाचे मुख्य प्रशिक्षक म्हणून ते किती चांगले काम करतात हे पाहणे रोमांचक असेल. ते इंडियन सुपर लीगचे पहिले प्रशिक्षक देखील आहेत.
