चॅम्पियन्स ट्रॉफीचा अंतिम सामना आज 09 मार्च रोजी दुबईच्या मैदानावर भारत आणि न्यूझीलंड यांच्यात खेळला जाईल. भारतीय संघाचे गोलंदाज आणि फलंदाज चांगल्या फॉर्ममध्ये आहेत आणि भारतीय संघाने चालू स्पर्धेत एकही सामना गमावलेला नाही. आता अंतिम सामन्यापूर्वीच आयसीसीने 2025च्या चॅम्पियन्स ट्रॉफीसाठी प्लेअर ऑफ द टूर्नामेंट कोण जिंकू शकतो हे जाहीर केले आहे. यासाठी 10 खेळाडूंची यादी जाहीर करण्यात आली आहे. त्यात चार भारतीय खेळाडूंची नावेही समाविष्ट करण्यात आली आहेत. यामध्ये रचिन रवींद्र, मॅट हेन्री, मिशेल सँटनर, केन विल्यमसन, ग्लेन फिलिप्स, अझमतुल्ला उमरझाई, विराट कोहली, मोहम्मद शमी, श्रेयस अय्यर आणि वरुण चक्रवर्ती यांची नावे आहेत.
1. विराट कोहली
या चॅम्पियन्स ट्रॉफीमध्ये विराट कोहलीने शानदार कामगिरी केली. त्याने पाकिस्तानविरुद्ध 100* धावांची शानदार खेळी केली. याशिवाय, त्याने ऑस्ट्रेलियाविरुद्ध कठीण परिस्थितीत 84 धावा केल्या. आतापर्यंत त्याने चालू स्पर्धेतील चार सामन्यांमध्ये 217 धावा केल्या आहेत. या दरम्यान त्याने 7 झेलही घेतले आहेत. ऑस्ट्रेलिया आणि पाकिस्तानविरुद्धच्या चांगल्या कामगिरीसाठी त्याला सामनावीराचा पुरस्कारही मिळाला.
2. श्रेयस अय्यर
श्रेयस अय्यरने चॅम्पियन्स ट्रॉफी 2025 मध्ये पूर्ण आत्मविश्वासाने फलंदाजी केली आहे. जेव्हा टीम इंडिया संकटांनी घेरलेली असताना त्याने संयमी फलंदाजीचे प्रदर्शन केले आहे. तो सध्याच्या भारतीय फलंदाजी क्रमातील एक महत्त्वाचा दुवा आहे. त्याचे क्षेत्ररक्षणही उत्कृष्ट राहिले आहे. आतापर्यंत त्याने या चॅम्पियन्स ट्रॉफीच्या चार सामन्यांमध्ये एकूण 195 धावा केल्या आहेत.
3. वरुण चक्रवर्ती
कर्णधार रोहित शर्माने एक मोठा निर्णय घेत न्यूझीलंडविरुद्धच्या सामन्याच्या अंतिम अकराव्या संघात वरुण चक्रवर्तीला संधी दिली. यानंतर, वरुणने प्रशिक्षक आणि कर्णधाराच्या अपेक्षा पूर्णपणे पूर्ण केल्या. त्याने न्यूझीलंडविरुद्ध 5 विकेट्स घेतल्या. तो विजयात सर्वात मोठा नायक म्हणून उदयास आला. यानंतर, त्याने ऑस्ट्रेलियाविरुद्ध दोन उपयुक्त विकेट्सही घेतल्या.
4. मोहम्मद शमी
मोहम्मद शमीने चॅम्पियन्स ट्रॉफी 2025च्या बांगलादेशविरुद्धच्या पदार्पणाच्या सामन्यात 5 विकेट्स घेतल्या. यानंतर त्याने ऑस्ट्रेलियाविरुद्ध तीन विकेट्स घेतल्या. तो चालू स्पर्धेत आतापर्यंत सर्वाधिक 8 विकेट्स घेणारा दुसऱ्या क्रमांकाचा गोलंदाज आहे.
हेही वाचा-
विराट कोहली अंतिम सामन्यात खेळणार का? दुखापतीबद्दल एक मोठी अपडेट समोर
भारतीय संघासाठी डोकेदुखी ठरू शकतो न्युझीलंंडचा हा खेळाडू , भारताशी आहे जुन नातं
