इंडियन प्रीमियर लीगच्या (IPL) 19व्या हंगामातील 67व्या सामन्यात विराट कोहली (Virat Kohli and Travis Head) आणि ट्रॅव्हिस हेड यांच्यात मोठा वाद पाहायला मिळाला. हा सामना संपल्यानंतर कोहलीने हेडशी हस्तांदोलन न केल्याचा एक व्हिडिओ समोर आला, जो सोशल मीडियावर प्रचंड व्हायरल होत आहे. या वादानंतर आता ट्रॅव्हिस हेडने आपल्या इंस्टाग्राम अकाउंटवर एक रील पोस्ट केली आहे, ज्यावर चाहते वेगवेगळ्या प्रकारे प्रतिक्रिया देत आहेत.
रॉयल चॅलेंजर्स बंगळुरू (RCB) विरुद्धच्या सामन्यात जेव्हा सनरायझर्स हैदराबादचा (SRH) विजय निश्चित झाला, तेव्हा ट्रॅव्हिस हेडला गोलंदाजी करण्याची संधी मिळाली. हेड सहसा जास्त गोलंदाजी करताना दिसत नाही. या सामन्यात त्याने आरसीबीचा कर्णधार रजत पाटीदारची (Rajat Patidar) विकेटही घेतली. सामन्यानंतर त्याने इंस्टाग्रामवर गोलंदाजी करतानाचा स्वतःचा फोटो शेअर केला आणि कॅप्शनमध्ये लिहिले, शरीराला थोडं संभ्रमात (दुविधेत) राहू द्या. हेडच्या या पोस्टनंतर चाहते याचा संबंध विराट कोहलीसोबत झालेल्या वादाशी जोडत आहेत. हेडने या पोस्टच्या माध्यमातून कोहलीला उत्तर दिले आहे, असे चाहत्यांचे मानणे आहे. मात्र, हेडच्या पोस्टचा रोख पाहिला तर, त्याला आपल्या शरीराला एकाच प्रकारच्या दिनक्रमाची सवय लावायची नाही, एवढाच त्याचा स्पष्ट अर्थ आहे.
सनरायझर्स हैदराबादविरुद्ध आरसीबी जेव्हा धावांचा पाठलाग करत होती, तेव्हा व्यंकटेश अय्यर (Venktesh Iyer) वेगाने धावा करत होता. त्याचवेळी कोहली आणि हेड यांच्यात शाब्दिक चकमक झाली. त्यावेळी कोहलीने हेडला काही चेंडू टाकण्याचे (गोलंदाजी करण्याचे) आव्हान दिले. त्यावर काही वेळाने उत्तर देताना हेड कोहलीला म्हणाला, मी गोलंदाजीला येण्यापूर्वीच तू तर बाद झालास. हा वाद सामना संपल्यानंतर इतके वेगळे रूप घेईल, अशी कोणालाही अपेक्षा नव्हती. सामना संपल्यानंतर विराट कोहलीने हेडशी हात मिळवला नाही, आणि कोहलीच्या या रिऍक्शनने सर्वांनाच आश्चर्याचा धक्का दिला.
