Sourav Ganguly Statement On Rishabh Pant: रिषभ पंतची नुकतीच भारतीय कसोटी संघाच्या उपकर्णधारपदी निवड झाली आहे. दरम्यान आता भारताचा माजी कर्णधार सौरव गांगुलीने नवीन उपकर्णधाराला सल्ला दिला आहे. पंतवर त्याच्या निष्काळजी शॉट्स खेळण्याबद्दल अनेक वेळा टीका झाली आहे, आता इंग्लंडविरुद्धच्या कसोटी मालिकेपूर्वी गांगुलीने त्याला महत्त्वाचा सल्ला दिला आहे. गांगुली ऑस्ट्रेलियामध्ये पंतच्या शॉट्स निवडीबद्दलही खुश नाही आणि तो इंग्लंडमध्ये जबाबदारीने खेळावा अशी त्याची इच्छा आहे.
रेव्ह स्पोर्ट्सशी बोलताना सौरव गांगुली म्हणाला की त्याला ऑस्ट्रेलियामध्ये रिषभ पंतची शॉट्स निवड अजिबात आवडली नाही. ‘दादा’ म्हणतात की पंतने प्रत्येक चेंडूवर बॅट स्विंग करण्याऐवजी खंबीरपणे खेळण्यावर लक्ष केंद्रित करावे. (Sourav Ganguly gives advice to Rishabh Pant)
सौरव गांगुली म्हणाला, “मला पंतने ऑस्ट्रेलियामध्ये दाखवलेला खेळ आवडला नाही. तो खूप जास्त शॉट्स खेळण्याचा प्रयत्न करत होता. तो प्रत्येक चेंडूवर बॅट स्विंग करत होता, चेंडू हलत असलेल्या परिस्थितीत खेळण्याचा हा चांगला मार्ग नाही. त्याला लढावे लागेल.”
2024 मध्ये रिषभ पंतने 9 कसोटी सामने खेळले आणि 36च्या सरासरीने 576 धावा केल्या. गेल्या वर्षी त्याने कसोटी सामन्यात 1 शतक आणि 3 अर्धशतके केली. त्याच वेळी, ऑस्ट्रेलियाविरुद्धच्या बॉर्डर-गावस्कर ट्रॉफीमध्ये, तो 10 डावांमध्ये फक्त 255 धावा करू शकला. पंतला या 10 डावांमध्ये फक्त 1 अर्धशतक करता आले. खराब शॉट्स खेळल्यामुळे तो 10 पैकी 8 वेळा झेलबाद झाला हे देखील एक उल्लेखनीय सत्य आहे.
