भारतीय क्रिकेट संघाचा युवा फलंदाज शुबमन गिल (shubman gill) आता टीम इंडियाचा नवा कसोटी कर्णधार बनला आहे. रोहित शर्माने (Rohit Sharma ) कसोटी क्रिकेटमधून निवृत्ती घेतल्यानंतर ही जबाबदारी गिलकडे सोपवण्यात आली आहे. त्याच वेळी, विराट कोहलीने (Virat Kohli) या फॉरमॅटमधून निवृत्तीची घोषणा आधीच केली आहे. अशा परिस्थितीत, शुबमन गिल आता इंग्लंडविरुद्ध सुरू होणाऱ्या 5 सामन्यांच्या कसोटी मालिकेसाठी संघाचे नेतृत्व करेल.
दरम्यान, शुबमन गिल याचे एक विधान सोशल मीडियावर व्हायरल होत आहे, ज्यामध्ये त्यांनी विराट कोहली आणि रोहित शर्मा यांच्या कर्णधारपदातील जो फरक आहे त्याबद्दल आपले मत मांडले आहे. त्याने स्पष्ट केले की दोघांच्या नेतृत्व करण्याच्या पद्धतीत फरक आहे आणि या दिग्गजांकडून त्याने काही खास गोष्टी शिकल्या आहेत.
स्काय स्पोर्ट्सशी बोलताना शुबमन गिल म्हणाला की, जेव्हा मी विराट कोहलीच्या नेतृत्वाखाली खेळायचो, तेव्हा त्याची मैदानावरील सक्रियता, विचार आणि नियोजन पाहण्यासारखे होते. जर एक योजना अयशस्वी झाली तर त्याच्याकडे लगेच दुसरी योजना तयार असायची. गोलंदाजांशी त्याचा संवादही खूप चांगला होता. गिल म्हणाला की, त्याने विराट कोहलीकडून खूप काही शिकले आहे, विशेषतः कसोटी सामन्यात प्रत्येक क्षणी लक्ष केंद्रित करणे आणि ऊर्जा प्रस्थापित करणे किती महत्त्वाचे आहे.
दुसरीकडे, रोहित शर्माबद्दल गिल म्हणाला की, रोहित भाई रणनीती बनवण्यात खूप आक्रमक आहेत आणि ते संघातील प्रत्येक खेळाडूशी स्पष्टपणे बोलतात. मालिकेदरम्यान असो किंवा मालिकेनंतर, ते नेहमीच संघ आणि खेळाडूंकडून त्यांना नेमके काय हवे आहे हे सांगतात.
