‘मला फक्त २०२३चा विश्वचषक खेळायचा आहे’, असे म्हणत भारताच्या सलामीवीराने सांगितला त्याचा फ्युचर प्लान

झिम्बाब्वे दौऱ्यासाठी भारतीय संघ (ZIMvsIND) केएल राहुलच्या नेतृत्वाखाली रवाना झाला आहे. यामध्ये भारताच्या कर्णधारपदी शिखर धवनची निवड करण्यात आली होती. मात्र ऐनवेळी कर्णधार बदलण्याने क्रिकेटविश्वात नव्या चर्चेला सुरूवात झाली. यामध्ये काहींनी धवनवर अन्याय झाला, तर राहुलने यावर्षात एकही आंतरराष्ट्रीय सामना खेळला नसला तरी त्याला कर्णधार का केले ही प्रश्ने निर्माण झाली. या सगळ्याकडे दुर्लक्ष करत धवनने मोठे वक्तव्य केले आहे. त्यामध्ये त्याने त्याच्या भविष्यातील कामगिरीचे विचार मांडले आहेत.

शिखर धवन (Shikhar Dhawan) भारतीय संघाचा स्फोटक सलामीवीर. त्याने एका वृत्तसंस्थेला दिलेल्या मुलाखतीत म्हटले “माझी वनडे विश्वचषकासाठी तयारी सुरू आहे. ज्यामुळे मला जेवढे वनडे सामने खेळता येईल तेवढे मी खेळण्याचा प्रयत्न करणार आहे.”

धवन या डावखुऱ्या फलंदाजाने भारताकडून आंतरराष्ट्रीय क्रिकेटच्या स्पर्धांमध्ये चांगली कामगिरी केली आहे. त्याने टाइम्स ऑफ इंडियाला दिलेल्या मुलाखतीत म्हटले,“मला आयसीसी स्पर्धांमध्ये खेळायला आवडते. त्यामध्ये खेळण्याची नेहमीच एक वेगळी भावना आणि समाधान असते. मी यापूर्वी काही खूप चांगल्या स्पर्धा खेळल्या आहेत. मी प्रत्येक स्पर्धेसाठी विशेष तयारी करतो आणि तसाच खेळ करतो.”