भारतात परतलेला सुरेश रैना परत दिसणार आयपीएलमध्ये, पण...

नवी दिल्ली। आयपीएलचा १३ वा हंगाम खेळण्यापूर्वीच मिस्टर आयपीएल सुरेश रैनाने माघार घेत सर्वांना आश्चर्याचा धक्का दिला होता. तो वैयक्तिक कारणांमुळे भारतात परतला होता. परंतु त्याने स्वत: असे संकेत दिले आहेत की तो पुन्हा आयपीएल फ्रँचायझी चेन्नई सुपर किंग्ज संघात पुनरागमन करू शकतो. माजी भारतीय यष्टीरक्षक दीप दास गुप्तालाही विश्वास आहे की, रैना आयपीएलमध्ये पुनरागमन करू शकतो.

सीएसके संघाकडून अद्याप रैनाच्या जागी इतर खेळाडूच्या नावाची घोषणा करण्यात आलेली नाही. युएईला पोहोचल्यानंतर सीएसके संघाचे १३ सदस्य कोरोना पॉझिटिव्ह आढळले होते. त्यानंतर रैनाने आयपीएलमधून बाहेर पडण्याचा निर्णय घेतला होता. दैनिक जागरणशी बोलताना त्याने स्वत: सांगितले होते की, तो कुटुंबाच्या सुरक्षेच्या कारणास्तव भारतात परतला आहे. त्याने हेही म्हटले की, १२ कोटी रुपये सोडण्याचा मोठा निर्णय असतो. परंतु मुलांच्या चांगल्यासाठी त्याला हा निर्णय घ्यावा लागला.

दीप दास गुप्ताने एका मुलाखतीत रैनाच्या पुनरागमनाबद्दल चर्चा करताना म्हटले, “मला असे वाटते की रैना पुन्हा एकदा आयपीएलमध्ये खेळताना दिसेल. कदाचित सुरुवातीच्या सामन्यात तो खेळणार नाही. कारण त्याला नियमांनुसार क्वारंटाईन केले जाईल. परंतु माझा असा विश्वास आहे की रैना पुनरागमन करेल.”

रैनानेही आयपीएलमध्ये पुनरागमन करण्याचे संकेत दिले होते. त्याने एका इंग्रजी क्रिकेट वेबसाईटशी बोलताना म्हटले होते, “मी क्वारंटाईनमध्येही इथे सराव करत आहे. तुम्ही मला पुन्हा शिबिरात पाहू शकता.”

विशेष म्हणजे सीएसकेचा अनुभवी फिरकीपटू हरभजन सिंगनेही वैयक्तिक कारणांमुळे आयपीएलमधून माघार घेतली आहे. त्याने ट्वीट करत याबाबत माहिती दिली होती. त्याने लिहिले होते की, “कुटुंबासोबत अशा कठीण काळात राहणे गरजेचे आहे.” सोबतच त्याच्या या निर्णयाचा सन्मान करण्यासाठी संघ व्यवस्थापनाला त्याने धन्यवादही दिला होता.

Dear Friends
I will not be playing IPL this year due to personal reasons.These are difficult times and I would expect some privacy as I spend time with my family. @ChennaiIPL CSK management has been extremely supportive and I wish them a great IPL
Stay safe and Jai Hind

— Harbhajan Turbanator (@harbhajan_singh) September 4, 2020