फक्त १० सामन्यांत चहल मोडणार विराटचा ९७३ आयपीएल धावांचा विक्रम? पाहा नक्की काय आहे प्रकरण

आयपीएल २०२२ मध्ये संजू सॅमसनच्या नेतृत्वातील राजस्थान रॉयल्सने जबरदस्त प्रदर्शन केले आहे. फिरकी गोलंदाज युजवेंद्र चहल या हंगामात राजस्थानचे प्रतिनिधित्व करत आहे. चहल त्याच्या उत्कृष्ट गोलंदाजीसोबतच मजेशीर अंदाजासाठी ओळखला जोतो. चालू हंगामात देखील त्याने स्वतःच्या प्रदर्शनाने आणि सहकारी खेळाडूंसोबत केलेल्या काही मजेशीर बाबींमुळे चाहत्यांचे मनोरंजन केले आहे. अशातच आता त्याने विराट कोहलीचा एका आयपीएल हंगामात सर्वाधिक धावा करण्याचा विक्रम मोडणार असल्याचे सांगितले. त्याचा हा दावा ऐकून चाहत्यांची चांगलीच करमणूक झाली.

राजस्थान रॉयल्सने काही दिवसांपूर्वी त्यांच्या यूट्यूब चॅनेलवर एक व्हिडिओ शेअर केला होता. या व्हिडिओत राजस्थानचा सलामीवीर जोस बटलर आणि फिरकी गोलंदाज युजवेंद्र चहल (Yuzvendra Chahal) एकमेकांच्या विपरीत भूमिकेत म्हणजेच चहल फलंदाजी करताना आणि बटलर गोलंदाजी करताना दिसले होते. या मजेशीर व्हिडिओवर चाहत्यांनी मोठ्या प्रमाणात लाईक्स आणि कमेंट्स केल्या होत्या. चहलने जेव्हापासून राजस्थान रॉयल्सच्या कॅम्पमध्ये आगमन केले आहे, तेव्हापासून बटलरसोबत त्याची चांगले मैत्रीपूर्ण संबंध पाहायला मिळाले आहे.