आयपीएल 2024 चा 11 वा सामना शनिवारी (30 मार्च) लखनऊ सुपर जायंट्स आणि पंजाब किंग्ज यांच्यात झाला. हा सामना लखनऊ येथील भारतरत्न श्री अटल बिहारी वाजपेयी एकना क्रिकेट स्टेडियमवर खेळला गेला. या सामन्यात लखनऊनं पंजाब किंग्जवर 21 धावांनी विजय मिळवला आहे.
नाणेफेक जिंकून प्रथम फलंदाजी करताना लखनऊनं क्विंटन डी कॉकच्या अर्धशतकाच्या बळावर 20 षटकांत आठ गडी गमावून 199 धावा केल्या. प्रत्युत्तरात, पंजाबचा संघ निर्धारित 20 षटकात गडी गमावून केवळ 178 धावाच करू शकला.
200 धावांच्या लक्ष्याचा पाठलाग करण्यासाठी उतरलेल्या पंजाब किंग्ज संघानं दमदार सुरुवात केली होती. धवन आणि बेअरस्टो यांच्यात पहिल्या विकेटसाठी 102 धावांची भागीदारी झाली. जॉनी बेअरस्टो 29 चेंडूत 42 धावा करून बाद झाला. प्रभासिमरननं 7 चेंडूत 19 धावांची खेळी खेळली. जितेश शर्माला बाद करून मयंक यादवनं सामन्यातील तिसरी विकेट घेतली. पंजाबकडून कर्णधार शिखर धवननं 50 चेंडूत सर्वाधिक 70 धावा केल्या. मात्र डावाच्या शेवटच्या 10 षटकांत सातत्याने विकेट पडल्यामुळे पंजाबचा सामना 21 धावांनी गमवावा लागला.
सामन्यात एके काळी पंजाबने 11 षटकांनंतर एकही विकेट न गमावता 101 धावा केल्या होत्या. मात्र नवोदित मयंक यादवचा स्पेल सुरू होताच सामना लखनऊच्या बाजूनं झुकला. मयंकनं जॉनी बेअरस्टो, प्रभसिमरन सिंग आणि जितेश शर्माला पॅव्हेलियनमध्ये पाठवलं. याच सामन्यात त्यानं आयपीएल 2024 मधील सर्वात वेगवान चेंडू देखील टाकला.
प्रथम फलंदाजीसाठी आलेल्या लखनऊ सुपर जायंट्सची सुरुवात दमदार झाली. मात्र, चौथ्या षटकात केएल राहुल 9 चेंडूत 15 धावा काढून पॅव्हेलियनमध्ये परतला. देवदत्त पडिक्कलला 6 चेंडूत केवळ 9 धावा करता आल्या. मार्कस स्टाइनिसनं 12 चेंडूत 19 धावा केल्या.
लखनऊसाठी क्रुणाल पांड्या, क्विंटन डी कॉक आणि निकोलस पूरन यांनी चमकदार कामगिरी केली. पांड्याने 22 चेंडूत नाबाद 43 धावा केल्या. त्यानं 4 चौकार आणि 2 षटकार मारले. पूरननं 21 चेंडूत 42 धावा ठोकल्या. डी कॉकनंही अर्धशतक झळकावलं. त्यानं 38 चेंडूत 54 धावा केल्या.
पंजाब किंग्जकडून गोलंदाजी करताना सॅम कुरननं 3 बळी घेतले. त्यानं 4 षटकात 28 धावा दिल्या. अर्शदीप सिंगनं 3 षटकात 30 धावा देत 2 बळी घेतले. कागिसो रबाडा आणि राहुल चहर यांनी प्रत्येकी एक विकेट घेतली.
दोन्ही संघाची प्लेइंग 11 :
लखनऊ सुपर जायंट्स – क्विंटन डी कॉक (विकेटकीपर), केएल राहुल, देवदत्त पडिक्कल, आयुष बदोनी, निकोलस पूरन (कर्णधार), मार्कस स्टॉयनिस, क्रुणाल पांड्या, रवी बिश्नोई, मोहसिन खान, मयंक यादव, मणिमारन सिद्धार्थ
इम्पॅक्ट प्लेअर्स – ॲश्टन टर्नर, नवीन-उल-हक, अमित मिश्रा, दीपक हुडा, के गौथम
पंजाब किंग्ज – शिखर धवन (कर्णधार), जॉनी बेअरस्टो, लियाम लिव्हिंगस्टोन, सॅम करन, जितेश शर्मा (विकेटकीपर), शशांक सिंग, हरप्रीत ब्रार, हर्षल पटेल, कागिसो रबाडा, राहुल चहर, अर्शदीप सिंग
इम्पॅक्ट प्लेअर्स – प्रभसिमरन सिंग, रिली रौसो, तनय थागराजन, विद्वत कवेरप्पा, हरप्रीत भाटिया
महत्त्वाच्या बातम्या-
सलग दोन षटकार अन् तिसऱ्या चेंडूवर चारी मुंड्या चीत! स्टॉइनिस विरुद्ध राहुल चहरचा जोरदार कमबॅक
केएल राहुलचा प्लॅन फसला, अर्शदीपच्या जाळ्यात अडकून स्वस्तात बाद
पूरन-क्रुणालची तुफानी फटकेबाजी, पंजाबसमोर विजयासाठी 200 धावांचं लक्ष्य
