रविवारी, गुजरात टायटन्सने पंजाब किंग्सचा पराभव केला. स्टार सलामीवीर साई सुदर्शनची 57 धावांची खेळी आणि त्यांच्या तीन गोलंदाजांनी केलेली भेदक गोलंदाजी या विजयात निर्णायक ठरली. मोहम्मद सिराज, जेसन होल्डर आणि कागिसो रबाडा यांच्या धारदार गोलंदाजीच्या जोरावर, टायटन्सने पंजाबला 163 धावांवर रोखले. विजयाचे लक्ष्य गाठताना, सुदर्शनने पुन्हा एकदा आपल्या संघासाठी एक दमदार खेळी साकारली. सुंदरनेही 40* धावांची खेळी करत विजयात महत्त्वपूर्ण योगदान दिले. या पराभवानंतरही, पंजाब संघ गुणतालिकेत अव्वल स्थानी कायम आहे.
पंजाबचा पराभव आणि गुजरातच्या विजयानंतरही, स्पर्धेच्या गुणतालिकेत कोणताही बदल झालेला नाही. श्रेयस अय्यरच्या नेतृत्वाखालील पंजाब संघ पहिल्या क्रमांकावर कायम आहे. गुजरात टायटन्स गुणतालिकेत पाचव्या स्थानावर कायम आहेत. या विजयानंतर, शुबमन गिलच्या संघाची गुणसंख्या वाढून 12 झाली आहे, तर पंजाब किंग्स 13 गुणांवर आहेत.
सध्याच्या स्थितीनुसार गुणतालिकेवर नजर टाकल्यास असे दिसून येते की, पंजाबकडे 13 गुण आहेत. त्यांनी आतापर्यंत 9 सामने खेळले असून, त्यापैकी 6 सामन्यांत विजय मिळवला आहे, 2 सामन्यांत पराभव पत्करला आहे आणि एक सामना अनिर्णित राहिला आहे. दुसऱ्या क्रमांकावर रॉयल चॅलेंजर्स आहेत. त्यांनीही पंजाबइतकेच 9 सामने खेळले असून, 6 विजय आणि 3 पराभवांसह त्यांच्या खात्यात 12 गुण जमा आहेत. सनरायझर्स हैदराबाद संघाने 10 सामने खेळले असून, त्यात ६ विजय आणि 4 पराभव नोंदवले आहेत; त्यांचेही गुण 12 आहेत. राजस्थान रॉयल्स आणि गुजरात यांनी हैदराबादइतकेच सामने खेळले असून तितकेच विजय मिळवले आहेत; निव्वळ धावगतीच्या आधारे ते सध्या अनुक्रमे चौथ्या आणि पाचव्या क्रमांकावर आहेत.
चेन्नई सुपर किंग्ज आणि दिल्ली कॅपिटल्स या दोन्ही संघांनी प्रत्येकी 9 सामने खेळले असून, प्रत्येकी 4 विजय मिळवत 8 गुण संपादन केले आहेत. गुणतालिकेत चेन्नई सहाव्या आणि दिल्ली सातव्या क्रमांकावर आहे. कोलकाता नाईट रायडर्सने आपल्या 9 सामन्यांपैकी 3 सामन्यांत विजय मिळवला असून, ते सध्या आठव्या क्रमांकावर आहेत. नवव्या क्रमांकावर मुंबईचा संघ आहे, ज्यांच्या नावावर 9 सामन्यांनंतर केवळ 2 विजय आहेत. गुणतालिकेच्या अगदी तळाशी लखनऊ सुपर जायंट्स आहेत, ज्यांनी आतापर्यंत 8 सामने खेळल्यानंतर केवळ 2 सामने जिंकण्यात यश मिळवले आहे.
