दीपक हुड्डाच्या तुफानी फलंदाजीमागचे रहस्य आले पुढे, अजून कोणी नव्हे ‘या’ खेळाडूने दिलेलं गुरू ज्ञान!

आयर्लंड आणि भारत यांच्यातील दोन सामन्यांच्या टी-२० मालिकेचा पहिला सामना रविवारी (२६ जून) खेळला गेला. भारताने या सामन्यात ७ विकेट्स आणि १६ चेंडू शिल्लक ठेवून विजय मिळवला. युझवेंद्र चहल आणि दीपक हुड्डाने संघासाठी सर्वात महत्वाचे योगदान दिले आणि विजय देखील मिळवला. सामना संपल्यानंतर या दोघांमध्ये चर्चा झाली. चर्चेदरम्यान, हुड्डाला चांगली फलंदाजी करण्यासाठी मी मार्गदर्शन केले, असे चहल म्हटला.

युझवेंद्र चहल (Yuzvendra Chahal) या सामन्यात सामनावीर ठरला. त्याने टाकलेल्या ३ षटकांमध्ये ११ धावा खर्च केल्या आणि १ विकेटही घेतली. तर २७ वर्षीय दीपक हुड्डा (Deepak Hooda) पहिल्यांदाच सलामीवीराच्या भूमिकेत दिसला. ऋतुराज गायकवाड दुखापतीमुळे खेळू शकला नाही, अशात हुड्डावर सलामीची जबाबदारी येऊन पडली. हुड्डा या सामन्यात जबरदस्त फॉर्ममध्ये दिसला आणि त्याने २९ चेंडूत नाबाद ४७ धावा फटकावल्या.

सामना संपल्यानंतर चहल आणि हुड्डा यांनी बीसीसीआयसाठी एकत्र चर्चा केली. चर्चेदरम्यान चहल गमतीशीर अंदाजात म्हणाला की, “हुड्डा ज्याने पहिल्या डावात सलामी केली, त्याला मी आधीच सांगितले होते की, त्याला कशा पद्धतीने फलंदाजी करायची आहे?” त्यानंतर हुड्डा म्हणाला की, “फलंदाजी करताना थोडा चिंतेत होतो, पण आयुष्यात थोडी आव्हाने असायलाच हवीत.”