केएल राहुल आयपीएल २०२६ मध्ये धडाकेबाज फलंदाजी करताना दिसत आहेत. सध्या ते या हंगामात सर्वाधिक धावा करून ऑरेंज कॅप आपल्या शिरावर मिरवत आहेत. अनेकदा त्यांच्या स्ट्राईक रेटवर प्रश्नचिन्ह उपस्थित केले जात असे, परंतु यावेळी राहुल तुफानी अंदाजात खेळताना दिसत आहेत. या कामगिरीमुळे राहुलचे टीम इंडियामध्ये पुन्हा एकदा पुनरागमन होऊ शकते. त्यांनी स्वतः सांगितले आहे की, यावेळेस त्यांच्या नावावर असलेला एक मोठा ‘टॅग’ कसा हटला आहे.
माहितीनुसार, राहुलने टीम इंडियासाठी शेवटचा टी-२० सामना नोव्हेंबर २०२२ मध्ये खेळला होता. त्यांना ‘मेन इन ब्लू’साठी टी-२० सामना खेळून आता ४ वर्षांचा काळ लोटला आहे. मात्र, आता अचानक राहुलच्या विधानामुळे भारताच्या टी-२० संघात त्यांच्या पुनरागमनाची चर्चा रंगू लागली आहे.
जिओस्टारशी बोलताना राहुलने सांगितले की, यावेळच्या आयपीएलने त्यांच्या डोक्यावर असलेला ‘टेस्ट प्लेयर’चा टॅग कसा हटवला आहे. राहुलने म्हटले की, त्यांना कधीच टी-२० खेळाडू म्हणून पाहिले गेले नव्हते.
राहुल म्हणाले, “१० वर्षांपूर्वी मी टी-२० संघाचा भाग होण्यासाठी सर्वकाही केले. मला कधीच टी-२० खेळाडू किंवा चांगला व्हाईट-बॉल खेळाडू मानले गेले नाही. मला नेहमी एक कसोटी खेळाडू (Test Player) म्हणून पाहिले गेले. त्यामुळे, त्या चौकटीतून बाहेर पडणे, आपला व्हाईट-बॉल गेम विकसित करणे आणि इथपर्यंत पोहोचणे ही अशी गोष्ट आहे ज्याचा मला खरोखर अभिमान आहे.”
राहुल पुढे म्हणाले, “या प्रवासात माझ्याकडून चुका झाल्या आहेत आणि अशा अनेक गोष्टी आहेत ज्या मी अधिक चांगल्या प्रकारे करू शकलो असतो. पण, मला या गोष्टीचा अभिमान आहे की मी प्रत्येक वेळी खेळताना आपली सर्वोत्तम कामगिरी केली आहे आणि यशाची जास्तीत जास्त शक्यता निर्माण करण्यासाठी सर्व तयारी केली आहे. खेळात हेच तर घडते, गोष्टी नेहमीच तुमच्या बाजूने नसतात. तुम्हाला हे सहजतेने स्वीकारावे लागेल आणि या प्रवासाचा आनंद घ्यावा लागेल.”
राहुल पुढे म्हणाले, “मी नेहमीच समतोल राखण्याचा प्रयत्न केला आहे, मग मी जिंको किंवा हरू. जेव्हा जेव्हा मला माझ्या उणिवांची जाणीव होते, तेव्हा मी स्वतःला माझ्या यशाची आठवण करून देतो, ज्यामुळे मला योग्य दृष्टीकोन मिळतो. माझ्याकडे अजूनही वेळ आहे. त्यामुळे, मी माझे सर्वोत्तम देत राहीन आणि बघूया मी किती ट्रॉफी जिंकू शकतो.”
