आयपीएल 2025 चा 31 वा सामना पंजाब किंग्ज आणि कोलकाता नाईट रायडर्स यांच्यात न्यू चंदीगडमधील मुल्लानपूर क्रिकेट स्टेडियमवर खेळवण्यात आला. हा एक कमी धावांचा सामना होता जो पंजाब किंग्जने 16 धावांनी जिंकला. या सामन्यात केकेआरच्या गोलंदाजांनी शानदार कामगिरी केली. त्यांनी प्रथम फलंदाजी करणाऱ्या पंजाब किंग्जला 15.3 षटकांत 111 धावांवर गुंडाळले. पण कोलकाता 112 धावांचे लक्ष्य गाठू शकला नाही आणि त्यांचा डाव 95 धावांवर संपला. सामन्यानंतर कोलकात्याचा कर्णधार अजिंक्य रहाणेने स्वतः या लाजिरवाण्या पराभवाची जबाबदारी घेतली.
अजिंक्य रहाणेने सामना झाल्यावर बोलताना सांगितलं की, आता त्याच्याकडे सांगायला काहीच शिल्लक नाही, मैदानात काय झालं ते सगळ्यांनी पाहिलं. तो टीमच्या कामगिरीवर खूप नाराज आहे. त्याने पराभवाची जबाबदारी घेतली. रहाणेला वाटतं की त्याने चुकीचा शॉट मारला. तो पुढे म्हणाला की, त्याला DRS बद्दल काही धोका घ्यायचा नव्हता. त्याला असं वाटलं की या विकेटवर बॅटिंग करणं सोपं नव्हतं, पण 111 धावांचा पाठलाग करणं शक्य होतं. बॅटिंग युनिट म्हणून त्यांच्या टीमची कामगिरी खूपच खराब होती.
रहाणे पुढे म्हणाला की, पंजाबच्या मजबूत बॅटिंग लाईनअपविरुद्ध त्यांच्या बॉलर्सनी चांगली कामगिरी केली. त्याला असं वाटलं की टीमचे बॅट्समन शॉट्स खेळताना निष्काळजी होते. बॅटिंग युनिट म्हणून त्यांना पूर्ण जबाबदारी घ्यावी लागेल. सामना हरल्यानंतर रहाणे म्हणाला की, त्याच्या मनात खूप गोष्टी सुरू होत्या. या पराभवामुळे तो खूप निराश झाला आहे आणि त्याला स्वतःला शांत ठेवणं गरजेचं आहे. रहाणेने असंही म्हटलं आहे की, इथून पुढे तो या पराभवानंतर त्याच्या टीमशी काय बोलणार याचा विचार करेल.
सामन्याबद्दल बोलायचं झालं तर, पंजाबने टॉस जिंकून पहिले बॅटिंग करण्याचा निर्णय घेतला. या सामन्यात प्रियांश आर्य आणि प्रभसिमरन सिंग यांनी टीमला चांगली सुरुवात करून दिली, पण हे दोन्ही बॅट्समन आऊट झाल्यावर PBKS चा डाव गडगडला. संपूर्ण टीम 20 ओव्हर्सही खेळू शकली नाही. प्रभसिमरनने 15 बॉलमध्ये 30 रन्सची खेळी केली. प्रियांशने 12 बॉलमध्ये 22 रन्स केले. KKR कडून हर्षित राणाने सगळ्यात जास्त 3 विकेट्स घेतल्या. वरुण चक्रवर्ती आणि सुनील नारायण यांनी प्रत्येकी 2 विकेट्स घेतल्या. वैभव अरोरा आणि एनरिक नोर्किया यांना प्रत्येकी 1 यश मिळालं.
112 रन्सचं टार्गेट पाहता, कोलकाता हा सामना सहज जिंकेल असं वाटत होतं. पण तसं झालं नाही, पंजाबच्या बॉलर्सनी चांगली कामगिरी केली आणि या धावसंख्येचा बचाव केला. कोलकात्याकडून फक्त 3 बॅट्समननाच 10 रन्सच्या पुढे जाता आलं. अंगकृष रघुवंशीने 28 बॉलमध्ये 5 फोर आणि 1 सिक्सच्या मदतीने 37 रन्सची खेळी केली. रहाणेने 17 आणि रसेलने 17 रन्स केले. पंजाबकडून युजवेंद्र चहलने सगळ्यात जास्त 4 विकेट्स घेतल्या आणि या चांगल्या कामगिरीसाठी त्याला सामनावीराचा पुरस्कार मिळाला.
