बांगलादेश क्रिकेट बोर्डाचा अध्यक्ष बदलताच बदलांचे वारे वाहू लागले आहेत. दोन दिवसांपूर्वीच नॅशनल स्पोर्ट्स कौन्सिलने अमीनुल इस्लाम बुलबुल यांच्या अध्यक्षतेखालील बोर्ड बरखास्त केले होते. अमीनुल यांची अध्यक्षपदावरून हकालपट्टी करण्यात आली आहे. पुढील 90 दिवसांत बीसीबीच्या निवडणुका होणार असून, तोपर्यंत बोर्डाचा कारभार तमीम इक्बाल यांच्या नेतृत्वाखालील 11 सदस्यांची समिती सांभाळणार आहे. इक्बाल यांनी अध्यक्षपद स्वीकारताच खेळाडूंच्या पगारवाढीचा निर्णय घेतला आहे.
नवे अध्यक्ष तमीम इक्बाल यांना जेव्हा समजले की, बांगलादेशच्या महिला क्रिकेटपटूंना एका एकदिवसीय (ODI) सामन्यासाठी फक्त 1000 बांगलादेशी टका मानधन मिळते, तेव्हा त्यांना मोठा धक्का बसला. ही रक्कम भारतीय चलनात साधारणपणे 750 रुपयांच्या बरोबरीची आहे. यानंतर तातडीने खेळाडूंच्या पगारात वाढ करण्याचा निर्णय घेण्यात आला आहे.
नव्या पगार रचनेनुसार (सॅलरी स्ट्रक्चर), आता महिला क्रिकेटपटूंना टी२० सामन्यासाठी 10000 टका (7,547 भारतीय रुपये), एकदिवसीय (ODI) सामन्यासाठी १५,००० टका (11,321 भारतीय रुपये) आणि प्रथम श्रेणी (First-class) सामन्यासाठी 20000 टका (15,095 भारतीय रुपये) मिळतील.
महिला क्रिकेटपटूंसाठी हा पगार अजूनही आदर्श नाही, मात्र या वाढीला एक चांगली सुरुवात मानले जाऊ शकते, असे तमीम इक्बाल यांचे मत आहे. त्यांनी सांगितले की, एकाच वेळी मोठी वाढ करणे शक्य नव्हते, परंतु खेळाडूंना चांगला पगार मिळणे आवश्यक आहे. भविष्यात महिला क्रिकेटपटूंच्या वेतनात आणखी वाढ होऊ शकते, असे संकेत तमीम यांच्या विधानातून मिळतात.
तमीम इक्बाल यांच्या अध्यक्षतेखालील बीसीबी ने पुरुष क्रिकेटपटूंच्या वेतनातही वाढ केली आहे. ‘अ’ श्रेणीतील (Category A) खेळाडूंना दरमहा 65 हजार बांगलादेशी टका, ‘ब’ श्रेणीतील (Category B) खेळाडूंना 50 हजार टका आणि ‘क’ श्रेणीतील (Category C) खेळाडूंना महिन्याला 40 हजार बांगलादेशी टका पगार मिळेल. तसेच, प्रथम श्रेणी क्रिकेटमध्ये आता खेळाडूंचे सामना शुल्क (मॅच फीस) 1 लाख बांगलादेशी टका असेल, जे आधी 70 हजार टका होते.
