रॉयल चॅलेंजर्स बेंगळुरूचा (आरसीबी) वेगवान गोलंदाज यश दयालवर बलात्काराचा गंभीर आरोप करण्यात आला आहे. जयपूरच्या सांगानेर पोलिस ठाण्यात त्याच्याविरुद्ध एफआयआर दाखल करण्यात आला आहे. पीडितेने आरोप केला आहे की, क्रिकेटपटूने दोन वर्षांपासून तिच्यावर वारंवार बलात्कार केला आहे, भावनिकदृष्ट्या ब्लॅकमेल केले आहे आणि क्रिकेट कारकिर्दीचे अमिष दाखवले आहे.
तक्रारीनुसार, पीडित मुलगी जयपूरमध्ये आयपीएल सामन्यादरम्यान, फक्त 17 वर्षांची असताना दयालशी पहिल्यांदा संपर्कात आली होती. दयालने तिला करिअर सल्ला देण्याच्या नावाखाली सीतापुरा येथील एका हॉटेलमध्ये बोलावले होते, जिथे पहिला लैंगिक अत्याचार झाला होता. असा दावा मीडिया रिपोर्ट्समध्ये करण्यात आला आहे.
पीडितेचा दावा आहे की ही पद्धत दोन वर्षांपासून सुरू होती, ती अल्पवयीन असताना सुरू झाली होती, ज्यामुळे पोलिसांनी अल्पवयीन मुलांशी संबंधित लैंगिक गुन्ह्यांसाठी कठोर कायदा असलेल्या लैंगिक गुन्ह्यांपासून मुलांचे संरक्षण (पॉक्सो) कायद्याअंतर्गत गुन्हा दाखल केला आहे.
या वर्षाच्या सुरुवातीला, गाझियाबादमधील एका महिलेने दयालवर लैंगिक छळ आणि शोषणाचा आरोप केल्यानंतर, भारतीय न्याय संहिता (BNS) च्या कलम 69 अंतर्गत गुन्हा दाखल करण्यात आला होता. मुख्यमंत्री तक्रार पोर्टलद्वारे (IGRS) दाखल केलेल्या तक्रारीच्या प्राथमिक चौकशीनंतर इंदिरापुरम पोलिस स्टेशनमध्ये एफआयआर नोंदवण्यात आला.
त्यावेळी क्रिकेटपटू यश दयालविरुद्ध बलात्काराचा आरोप करणाऱ्या महिलेने दावा केला की दयालने तिला आपल्या कुटुंबाशी ओळख करून दिली आणि विवाहित असल्यासारखे वागले. मात्र, तिच्या प्रश्नांवर तो हिंसक झाला. प्रत्युत्तरादाखल, दयालने प्रयागराज पोलिस ठाण्यात लेखी तक्रार दाखल केली आणि महिलेवर ब्लॅकमेलचा आरोप केला. अलाहाबाद उच्च न्यायालयाने एफआयआरवरील अटकेला तात्पुरती स्थगिती दिली असून, राज्य सरकार आणि तक्रारदाराला प्रत्युत्तर देण्याचे आदेश दिले आहेत.
