भारत आणि ऑस्ट्रेलिया संघादरम्यान नुकतीच चार सामन्यांची ऐतिहासिक कसोटी मालिका पार पडली. या मालिकेत भारताने सांघिक कामगिरीच्या बळावर 2-1 अशा फरकाने मालिका विजय मिळवला. मालिकेतील पहिल्या सामन्यात ऑस्ट्रेलियाकडून मानहानीकारक पराभव पत्करावा लागल्यानंतरही भारतीय संघाने जबरदस्त पुनरागमन केले.
भारताच्या या मालिका विजयात सर्वात जास्त चर्चा झाली ती अनिर्णित राहिलेल्या सिडनी कसोटी सामन्याची. विजयाच्या उंबरठ्यावर असलेल्या ऑस्ट्रेलियन संघाला भारतीय फलंदाजांनी चिवट कामगिरी करत विजयाची चव चाखू दिली नाही. भारतीय संघासाठी सिडनी कसोटी सामना अनिर्णीत राखण्यात यष्टीरक्षक रिषभ पंतने महत्वाची भूमिका बजावली. दुखापतग्रस्त असून देखील रिषभने 97 धावांची झुंजार खेळी केली. मालिका संपल्यानंतर रिषभने आपल्या सिडनी कसोटी सामन्यातील खेळीच्या आठवणी उलगडल्या आहेत.
“वेदनाशामक इंजेक्शन आणि गोळ्या घेऊन खेळलो”
रिषभ म्हणाला, “सिडनी कसोटी सामन्याच्या शेवटच्या दिवशी मी 97 धावांवर बाद झालो. पण माझ्या मते मी जर आणखी काही काळ मैदानावर असतो तर आम्ही तो सामना देखील जिंकला असता. फलंदाजी करण्याच्या अगोदर मी दोन इंजेक्शन घेतले होते. शिवाय वेदनाशामक गोळ्या देखील खाल्ल्या होत्या. पण या सर्व बाबी माझ्यासाठी दुय्यम होत्या. मी त्यावेळी चांगली फलंदाजी करत होतो व अशा संधीला सोडण्याची माझी मानसिकता नव्हती.”
रिषभने सिडनी येथील सामन्यात दुखापतग्रस्त असून देखील झुंजार खेळी केली. सामन्याच्या पाचव्या दिवशी रिषभने 112 चेंडूत 12 चौकार व 3 गगनचुंबी षटकारांच्या मदतीने 97 धावांची आक्रमक खेळी केली. इतकेच नाही तर रिषभने ब्रिस्बेन येथे खेळल्या गेलेल्या शेवटच्या कसोटी सामन्यात शानदार 89 धावांची खेळी करत भारताला सामना जिंकून दिला होता. याच खेळीसाठी त्याला सामनावीराचा पुरस्कार देखील मिळाला होता.
महत्वाच्या बातम्या:
लवकरच भारतात येतोय! बेन स्टोक्सने ट्विटरवर पोस्ट करत दिली माहिती, फोटो होतोय व्हायरल