सानिया मिर्झा म्हणते, शोएब मलिकची ही गोष्ट अजिबात आवडत नाही

नवी दिल्ली । भारताची स्टार टेनिसपटू सानिया मिर्झाने पाकिस्तानच्या एका महिला पत्रकाराशी बोलताना आपला पती शोएब मलिकबद्दलच्या सर्वात न आवडणाऱ्या एका गोष्टीचा खुलासा केला आहे.

शोएबबद्दल बोलताना ती म्हणाली की, जेव्हा शोएब (Shoib Malik) आणि तिच्यात भांडण होते, तेव्हा तो एकदम शांत असतो आणि कोणतीही प्रतिक्रिया देत नाही. तो आपल्या मनातील गोष्टी सांगत नाही किंवा भांडण त्याचवेळी संपविण्याचा प्रयत्नदेखील करत नाही. त्याची हीच सवय सानियाला आवडत नाही.

सानियाने पाकिस्तानची क्रीडापत्रकार झैनब अब्बासशी (Zainab Abbas) शोएबबरोबरच्या आपल्या लग्नाबद्दल आणि नात्याबद्दल मोकळेपणाने चर्चा केली. ती म्हणाली की, “आमच्यात जरी भांडण झाले तरीही आमची चर्चा सुरुच असते. भांडण झाले की शोएब काही बोलत नाही आणि गप्प राहतो. त्यावेळी माझा असा प्रयत्न असतो की, हे भांडण संपवले पाहिजे. कारण गोष्टी पुढे खूप काळापर्यंत ताणू शकतात.”

“मी चर्चा करून भांडण संपवणाऱ्यांपैकी एक आहे. तर शोएब आरामात चर्चा करण्यावर विश्वास ठेवतो. मी जेव्हा खूप काही बोलत असते, तेव्हा तो आपल्या फोनवर मग्न असतो. मला याची खूप चिड येते. मी हे सांभाळू शकत नाही,” असे ६ वेळा ग्रँड स्लॅमचे विजेतेपद पटकावणारी सानिया म्हणाली.