भारतीय क्रिकेट संघाचा माजी स्टार सलामीवीर शिखर धवनने आपल्या आयुष्यातील नव्या आणि सुंदर पर्वाला सुरुवात केली आहे. 12 जानेवारी 2026 रोजी धवनने आपली दीर्घकाळची मैत्रीण सोफी शाइन हिच्यासोबत साखरपुडा करत आयुष्याच्या दुसऱ्या इनिंगची घोषणा केली. ही आनंदाची बातमी धवनने सोशल मीडिया प्लॅटफॉर्म इंस्टाग्रामवर भावनिक पोस्टद्वारे चाहत्यांशी शेअर केली.
साखरपुड्याची माहिती देताना धवनने लिहिले, “हसण्याने सुरू झालेला हा प्रवास आता कायमस्वरूपी सोबतीत बदलला आहे. या नव्या प्रवासासाठी मिळालेल्या प्रेम आणि आशीर्वादाबद्दल आम्ही मनापासून कृतज्ञ आहोत.” ऑगस्ट 2024 मध्ये आंतरराष्ट्रीय क्रिकेटमधून निवृत्ती जाहीर केल्यानंतर धवन आपल्या वैयक्तिक आयुष्याच्या या नव्या टप्प्याबाबत अत्यंत उत्साही दिसत आहे.
धवन आणि सोफी यांची ओळख दुबईतील एका रेस्टॉरंटमध्ये झाली होती. 2023 साली पहिल्या पत्नीपासून घटस्फोट झाल्यानंतर धवनची सोफीशी भेट झाली आणि ही ओळख हळूहळू मैत्रीत, तर पुढे प्रेमात रूपांतरित झाली. सोफी शाइन मूळची आयर्लंडची असून, गेल्या काही वर्षांपासून संयुक्त अरब अमिरातीमध्ये वास्तव्यास आहे. पेशाने प्रॉडक्ट कन्सल्टंट असलेली सोफी वित्तीय सेवा क्षेत्रात अनुभवी असून सोशल मीडियावरही तिची चांगली फॅन फॉलोइंग आहे.
या जोडप्याने 1 मे 2025 रोजी सोशल मीडियावर आपल्या नात्याला अधिकृत दुजोरा दिला होता. साखरपुड्याच्या फोटोत हा खास क्षण अतिशय कलात्मक पद्धतीने टिपण्यात आला आहे. लाल फुलांनी सजवलेल्या हृदयाच्या आकाराच्या फ्रेममध्ये “The beginning of forever” असा संदेश लिहिलेला दिसतो. या फ्रेमसमोर धवन आणि सोफी एकमेकांचा हात धरून उभे असून, सोफीच्या बोटातील सगाईची अंगठी विशेष लक्ष वेधून घेत आहे.
मिळालेल्या माहितीनुसार, हे जोडपे गेल्या जवळपास एका वर्षापासून एकत्र राहत होते, त्यामुळे त्यांच्या नात्याची गंभीरता आधीच चर्चेत होती. साखरपुड्याची बातमी समजताच क्रिकेटविश्वातून आणि चाहत्यांकडून शुभेच्छांचा वर्षाव होत आहे.
आता सर्वांचे लक्ष या स्टार कपलच्या लग्नाकडे लागले आहे. माध्यमांच्या वृत्तानुसार, शिखर धवन आणि सोफी शाइन फेब्रुवारी 2026 मध्ये विवाहबंधनात अडकण्याची शक्यता आहे. अधिकृत तारीख जाहीर झालेली नसली तरी, विवाह विधी दिल्ली-एनसीआरमध्ये, तर मुख्य समारंभ गोवा येथे डेस्टिनेशन वेडिंग स्वरूपात होऊ शकतो, अशी चर्चा रंगली आहे.
