कोलंबो| गुरुवार रोजी (२९ जुलै) तिसऱ्या टी२० सामन्याने भारताच्या श्रीलंका दौऱ्याची सांगता झाली. २-१ ने सुरुवातीची वनडे मालिका जिंकल्यानंतर पाहुण्या भारताला टी२० मालिकेत पराभव पत्कारावा लागला. यजमान श्रीलंकाने दमदार पुनरागमन करत २-१ ने टी२० मालिका खिशात घातली. टी२० मालिकेतील दणदणीत विजयानंतर श्रीलंका क्रिकेट बोर्डाने आपल्या राष्ट्रीय संघाला मोठे बक्षीस दिले आहे. शुक्रवारी (३० जुलै) बोर्डाने श्रीलंका संघाला रोख १,००,००० डॉलर म्हणजे भारतीय रक्कमेनुसार ७४ लाख रुपयांचे पारितोषिक जाहीर केले आहे.
श्रीलंका बोर्डाने यासंदर्भात बोलताना सांगितले की, “श्रीलंका क्रिकेटच्या कार्यकारी समितीने भारताविरुद्धच्या महत्त्वपुर्ण टी२० मालिका विजयासाठी संघातील खेळाडू, प्रशिक्षक आणि सहयोगी स्टाफची तोंडभरुन स्तुती केली आहे. याबरोबरच दसुन शनाका आणि संघाला ७४ लाखांचे रोख बक्षीस देण्याचा निर्णयही घेण्यात आला आहे.”
३ सामन्यांच्या या टी२० मालिकेत दसुन शनाका श्रीलंका संघाचा नवनियुक्त कर्णधार होता. दुसरीकडे शिखर धवन भारतीय टी२० संघाच्या नेतृत्त्वपदी होता. तब्बल ३८ धावांनी पहिलावहिला टी२० सामना जिंकत धवनसेनेची मालिकेची विजयी सुरुवात केली होती. परंतु पहिल्या टी२० सामन्यानंतर संघातील अष्टपैलू कृणाल पंड्या कोरोना पॉझिटिव्ह आढळला. त्यामुळे त्याच्या संपर्कात आलेल्या ८ खेळाडूंना विलगीकरणात ठेवण्यात आले होते. यामध्ये सूर्यकुमार यादव, पृथ्वी शॉ, हार्दिक पंड्या, युझवेंद्र चहल अशा प्रमुख खेळाडूंचा सहभाग होता.
याचा परिणाम दुसऱ्या टी२० सामन्यावरही झाला होता. २७ जुलै रोजी होणारा हा सामना २८ जुलै रोजी खेळवण्यात आला. या सामन्यात प्रमुख खेळाडूंच्या अनुपस्थित अनुभवहीन शिलेदारांसह धवन मैदानावर उतरला होता. भारताने ४ विकेट्सने हा सामना गमावला होता. त्यानंतर तिसऱ्या आणि निर्णयाक टी२० सामन्यातही श्रीलंकेच्या खेळाडूंनी अष्टपैलू कामगिरी करत ७ विकेस्ट राखून भारताला धोबीपछाड दिला. परिणामी २-१ ने टी२० मालिका जिंकत त्यांनी भारतीय संघासोबतचा हिशोब बरोबर केला.
टी२० विश्वचषकापुर्वी श्रीलंका संघासाठी हा विजय प्रेरणादायी आणि आत्मविश्वास द्विगुणीत करणारा ठरला असेल.
महत्त्वाच्या बातम्या-
खुशखबर! कोलंबो टू इंग्लंड, विराटसेनेत सहभागी होण्यासाठी ‘या’ दिवशी उड्डाण भरणार सूर्यकुमार आणि शॉ
श्रीलंका दौरा गाजवत राहुल चाहरने ठोकली टी२० विश्वचषकासाठी दावेदारी, ‘या’ अनुभवीचे स्थान धोक्यात!
पाक गोलंदाजाच्या चेंडूचा मानेवर जबरदस्त रपाटा अन् विंडीजच्या फलंदाजाची दुर्दशा, अखेर सोडलं मैदान
