मुंबई। चिंचपोकळी सार्वजनिक उसत्व मंडळ आयोजित राज्यस्तरीय कबड्डी स्पर्धेत स्वस्तिक क्रीडा मंडळ, महाराष्ट्र कबड्डी संघ राहटणी पुणे, जय भारत, जॉली क्रीडा मंडळ, अमर क्रीडा मंडळ संघाचा बादफेरीत प्रवेश केला.
दुसऱ्या दिवशी ड गटात स्वस्तिक क्रीडा मंडळ विरुद्ध महाराष्ट्र कबड्डी संघात झालेल्या सामन्यांत स्वस्तिक ३६-२३ असा विजय मिळवत गटात विजयी राहिले. मध्यंतरापर्यत १९-११ अशी स्वस्तिककडे आघाडी होती. चढाईत अक्रम शेख पकडीत विक्की वाजले व निलेश शिंदे यांच्या खेळाच्या जोरावर स्वस्तिकने सहज विजय मिळवला.
ड गटात महाराष्ट्र कबड्डी संघाचा दुसरा सामना श्री हनुमान सेवा मंडळ यांच्या विरुद्ध झाला. दोन्ही संघांसाठी करो या मरोची लढत होती. मध्यंतरापर्यत १३-०९ अशी क्षुल्लक आघाडी महाराष्ट्र कबड्डी संघाकडे होती. मात्र मध्यंतरानंतर आक्रमक खेळ करत महाराष्ट्र कबड्डी संघाने ३२-१४ असा विजय मिळवला. चेतन थोरात, प्रसाद जखोले, सुमीत विचारे, अमोल नखाले यांनी चांगला खेळ केला.
ग गटात गोल्फादेवी संघाने जय बजरंग रायगड संघावर ४६-४४ असा विजय मिळवला. तर जय बजरंग संघाने दुसऱ्या लढतीत २७-२६ असा शिवशक्ती संघावर विजय मिळवला. आता ग गटातील गोल्फादेवी विरुद्ध शिवशक्ती यासामन्यावर सगळ्याचे लक्ष असेल. त्या सामन्यावर गटातील तीन पैकी कोणते दोन संघ बादफेरीत प्रवेश करतील हे अवलंबून असणार आहे
इ गटात बंड्या मारुती विरुद्ध केदारनाथ क्रीडा मंडळ यांच्यात चांगली लढत झाली. १५-१५ असा मध्यंतरापर्यत बरोबरीत सामना होता. सुशील कदम, आकाश कदम व पवन मोरे यांच्या उत्कृष्ट खेळाच्या जोरावर केदारनाथ क्रीडा मंडळाने ३५-२७ असा विजय मिळवला. बंड्या मारुती कडून जितेश सातपे व मंगेश होडगे चांगले बरे खेळले. विजय नवनाथ विरुद्ध बंड्या मारुती ही लढत महत्वपूर्ण असणार आहे.
जय भारत संघाने स्व आकाश क्रीडा मंडळ संघावर ४३-१६ असा विजय मिळवला. स्व आकाश गटातील दोन्ही सामने पराभूत झाल्याने त्याचे आव्हान संपुष्टात आले. अ गटात जॉली विरुध्द जय भारत हा सामना विजयी व उपविजयी साठी महत्वपूर्ण असेल.
रेल्वे पोलीस बॉईज विरुद्ध अंकुर स्पोर्ट्सने गटातील पहिला सामना ४१-३४ असा जिंकला. अंकुर कडून सुशांत साईल व किसन बोटे यांनी चांगला खेळ केला. तर रेल्वे पोलीस बॉईज कडून रोहित जाधव बरा खेळला. अमर क्रीडा मंडळाने युवा स्पोर्ट्सवर ३७-२२ असा विजय मिळवत गटात सर्व लढती जिंकत बादफेरीत प्रवेश केला. उर्वरित साखळी सामने तिसऱ्या दिवशी होणार असून दोन उपउपांत्यपूर्व फेरीचे सामने ही तिसऱ्या दिवशी खेळण्यात येणार आहेत.
