टीम इंडियाचा युवा स्टार 15 वर्षांचा वैभव सूर्यवंशी (Vaibhav Suryavanshi) हा एक उत्कृष्ट उभरता क्रिकेट खेळाडू आहे. अलीकडेच त्याला इंग्लंडमध्ये आंतरराष्ट्रीय पदार्पण करण्याची संधी मिळाली असून, त्याने भारतासाठी आतापर्यंत एकूण 6 टी-20 आंतरराष्ट्रीय सामने खेळले आहेत. असे असूनही, ऑस्ट्रेलियाविरुद्धच्या आगामी अंडर-19 मालिकेत त्याची निवड झालेली नाही.
मात्र, वीरेंद्र सेहवागचा (Virendra sehwag) मुलगा आर्यवीर आणि राहुल द्रविडचा (Rahul Dravid) मुलगा अन्वय यांना संघात स्थान मिळाले आहे. वैभव अवघ्या 15 वर्षांचा असतानाही त्याला अंडर-19 संघात का स्थान मिळाले नाही, असा प्रश्न आता चाहत्यांच्या मनात निर्माण झाला आहे.
वैभवची निवड न होण्यामागे बीसीसीआयचा (BCCI Rule) एक कडक नियम आहे. वास्तविक, बीसीसीआयने 2016 मध्ये एक नियम तयार केला होता. या नियमानुसार, एखादा खेळाडू आपल्या आयुष्यात फक्त एकदाच अंडर-19 विश्वचषक खेळू शकतो. याचा अर्थ असा की, जर एखाद्या खेळाडूने 15 किंवा 17 वर्षांच्या कमी वयात एकदा अंडर-19 विश्वचषक खेळला असेल, तर तो 19 वर्षांचा होण्यापूर्वी पुन्हा विश्वचषक आला तरी त्याला संघात निवडले जाणार नाही, जरी तो वयाच्या दृष्टीने खेळण्यास पात्र असला तरीही. याच नियमांमुळे वॉशिंग्टन सुंदर देखील 2016 मधील विश्वचषकानंतर पुढे 2018 मध्ये अंडर-19 विश्वचषक खेळू शकला नव्हता.
वैभव सूर्यवंशी याआधीच 2026 मध्ये अंडर-19 विश्वचषक खेळला आहे आणि बीसीसीआयच्या नियमांमुळे तो तो पुन्हा खेळू शकत नाही. यामुळेच निवडकर्त्यांनी इतर नवीन खेळाडूंना संधी मिळावी म्हणून त्याला या वेळी अंडर-19 संघात समाविष्ट केलेले नाही. ऑस्ट्रेलियाचा अंडर-19 संघ 18 सप्टेंबरपासून भारताच्या दौऱ्यावर येणार आहे. या दौऱ्यात राजकोट येथे 18, 21 आणि 23 सप्टेंबर रोजी दोन्ही संघांमध्ये तीन वनडे सामने खेळवले जातील. त्यानंतर दोन बहुदिवसीय (मल्टी-डे) सामने खेळवले जातील. ज्यातील पहिला सामना 27 ते 30 सप्टेंबर दरम्यान राजकोटमध्ये आणि दुसरा सामना 5 ते 8 ऑक्टोबर दरम्यान अहमदाबादच्या नरेंद्र मोदी स्टेडियमच्या ‘बी’ ग्राउंडवर होणार आहे.
लेग-स्पिन अष्टपैलू खेळाडू आर्यवीर सेहवाग आणि यष्टीरक्षक-फलंदाज अन्वय द्रविड यांची 15 खेळाडूंच्या वनडे संघात निवड करण्यात आली आहे, परंतु या दोघांपैकी एकालाही बहुदिवसीय (मल्टी-डे) सामन्यांसाठी संघात स्थान मिळालेले नाही. आर्यवीर सध्या 2026 च्या दिल्ली प्रीमियर लीगमध्ये (DPL) ‘वेस्ट दिल्ली लायन्स’ संघाकडून खेळत आहे, जिथे त्याने आतापर्यंत फक्त दोन सामने खेळले आहेत.
आर्यवीरला पहिल्यांदाच अंडर-19 वनडे संघात संधी मिळाली आहे, तर अन्वय आधीपासूनच या संघाचा भाग राहिला आहे.
