भारतीय संघाचे बहुतेक फलंदाज सध्या फॉर्मात दिसत आहेत, मग तो अभिषेक शर्मा असो किंवा कर्णधार सूर्यकुमार यादव, हे विरोधी संघाच्या मनात धडकी भरवण्यासाठी पुरेसे आहेत. याशिवाय यष्टिरक्षक-फलंदाज इशान किशन आणि अष्टपैलू खेळाडू शिवम दुबे हे देखील त्यांच्या फटकेबाजीसाठी ओळखले जातात. दुसरीकडे संजू सॅमसनची बॅट सध्या शांत असली, तरी तो कधीही मैदानावर वादळ निर्माण करू शकतो. यापैकी कोणीही टी-२० वर्ल्ड कपमध्ये ‘टॉप स्कोअरर’ ठरला, तर त्यात नवल वाटण्यासारखे काही नसेल.
ऑस्ट्रेलियाचा दिग्गज वेगवान गोलंदाज ग्लेन मॅकग्राने टीम इंडियाचा स्टार ओपनर अभिषेक शर्माची २०२६ च्या टी-२० वर्ल्ड कपमध्ये सर्वाधिक धावा करणारा खेळाडू म्हणून निवड केली आहे. त्याचा माजी सहकारी डॅमियन फ्लेमिंगने देखील सर्वाधिक धावा करण्याच्या बाबतीत भारतीय सलामीवीराचे समर्थन केले आहे. अभिषेक हे करून दाखवू शकतो, यात कोणालाही शंका नाही.
जगातील नंबर १ टी-२० आंतरराष्ट्रीय फलंदाज असलेल्या अभिषेक शर्माचा क्रिकेटच्या या सर्वात लहान फॉरमॅटमधील रेकॉर्ड उत्कृष्ट आहे. त्याने ३८ सामन्यांमध्ये ३७.०५ च्या सरासरीने आणि साधारण १९५ च्या स्ट्राईक रेटने जवळपास १,३०० धावा केल्या आहेत. २५ वर्षांचा अभिषेक २०२५ च्या आशिया कपमध्ये ‘प्लेयर ऑफ द टूर्नामेंट’ होता, जो त्याच्या करिअरमधील एकमेव मल्टी-नॅशनल टूर्नामेंट होता. अभिषेकची निर्भय फलंदाजी सर्वांनाच आवडते, म्हणूनच तो स्वबळावर सामना जिंकवून देण्याची क्षमता ठेवतो.
दुसरीकडे, ऑस्ट्रेलियन दिग्गज जेसन गिलेस्पीने आगामी टी-२० वर्ल्ड कपमध्ये सर्वाधिक धावा करणारा खेळाडू म्हणून दक्षिण आफ्रिकेच्या डेवाल्ड ब्रेविसची निवड केली आहे. २२ वर्षांचा हा खेळाडू अजूनही टी-२० आंतरराष्ट्रीय क्रिकेटमध्ये स्वतःची जागा निर्माण करत आहे; त्याची सरासरी २६ पेक्षा कमी आहे, परंतु २२ सामन्यांमध्ये त्याचा स्ट्राईक रेट १७१.३२ इतका जबरदस्त आहे.
